Mae'r Swyddfa Dywydd wedi cyhoeddi rhybudd melyn am law trwm i rannau o dde Cymru.

Bydd y rhybudd yn dod i rym am 10.00 ddydd Iau ac yn parhau hyd at 19.00.

Dywedodd llefarydd ar ran y Swyddfa Dywydd y gallai rhai ardaloedd ddioddef llifogydd yn sgil y tywydd garw.

"Bydd ardal o law trwm yn symud tua'r gogledd-ddwyrain ar draws yr ardal rhybuddio yn ystod y bore a'r prynhawn cyn clirio i'r dwyrain gyda'r nos," meddai.

"O ystyried y tywydd gwlyb iawn diweddar, mae potensial am rywfaint o darfu ar deithio ac mae llifogydd yn bosib."

Mae disgwyl i rhwng 15-25 mm o law ddisgyn o fewn ardal y rhybudd, gyda hyd at 50 mm yn bosib ar dir uchel.

Bydd y rhybudd yn effeithio ar y siroedd canlynol: 

• Abertawe

• Blaenau Gwent

• Bro Morgannwg

• Caerdydd

• Caerffili

• Casnewydd

• Castell-nedd Port Talbot

• Ceredigion

• Merthyr Tudful

• Rhondda Cynon Taf

• Sir Benfro

• Sir Gaerfyrddin

• Sir Fynwy

• Pen-y-bont ar Ogwr

• Powys

• Torfaen