Mae’r darlledwr Davina McCall wedi priodi ei phartner Michael Douglas mewn seremoni gudd ar ôl derbyn triniaeth am ganser yn ei hymennydd a’i bron.

Dywedodd ffynhonnell agos at y teulu wrth bapur newydd y Daily Mail bod trafferthion iechyd y gyflwynwraig 58 oed eleni wedi cyfrannu at benderfyniad y ddau i briodi yn gynt na’r disgwyl.

Roedd y triniwr gwallt Michael Douglas wedi cynnig ei phriodi yn ystod gwyliau yn Ibiza dri mis yn ôl.

Fe briododd y ddau ddydd Gwener gyda ffrindiau a theulu agos yn unig.

Fe dderbyniodd Davina McCall driniaeth i dynnu tiwmor ar yr ymennydd y llynedd. Fe gafodd ddiagnosis o ganser ar ei bron eleni.

“Roedd eu priodas yn berffaith, yn union beth oedden nhw ei eisiau,” meddai ffynhonnell agos at y teulu wrth y Daily Mail.

“Roedden nhw wedi dewis lleoliad bach yn agos at adref ac wedi gwahodd tua 10 o ffrindiau a theulu i fod yno gyda nhw.

“Maen nhw wedi bod trwy lot fawr yn y misoedd diwethaf gydag iechyd Davina ac roedden nhw’n teimlo mai dyma’r amser cywir i briodi yn swyddogol. Doedden nhw ddim yn gweld pwynt disgwyl.

“Fe wnaethon nhw barhau gyda bywyd fel arfer y diwrnod wedyn, a drwy gyd-ddigwyddiad roedden nhw’n westeion ym mhriodas ffrind.”