Bu farw dyn ar ôl i’r car yr oedd yn ei yrru daro fan ac yna wal ar yr A5 yn Sir Ddinbych fis diwethaf, mae cwest wedi clywed.

Wrth agor y gwrandawiad yn Rhuthun, fe ddywedodd yr Uwch Grwner John Gittins, fod Ryan Morris, o The Oaks yn Nhrefor, ger Llangollen, yn gyrru car Vauxhall Corsa ger Glyndyfrdwy toc cyn 06.00 ar fore Iau 20 Tachwedd.

“Roedd yn fore rhewllyd,” meddai Mr Gittins.

Clywodd y cwest fod y Corsa wedi croesi i’r lôn gyferbyn gan daro fan Mercedes Sprinter cyn taro wal.

Cadarnhaodd parafeddygon bod Mr Morris a oedd yn 39 oed, wedi marw yn y fan a’r lle.

Fe gafodd y cwest ei ohirio gyda dyddiad y gwrandawiad nesaf i’w gadarnhau maes o law.