Mae rhybudd oren am dywydd "allai beryglu bywyd" ddydd Llun wedi ei ymestyn i gynnwys mwy o ardaloedd yng Nghymru.

Mae’r Swyddfa Dywydd yn rhagweld y gallai bron i fis o law syrthio mewn 24 awr, gyda rhagolygon y gall 100-120mm syrthio mewn rhai mannau yn ne a chanolbarth Cymru.

Mae'r rhybudd sydd yn ymestyn drwy gydol dydd Llun yn nodi bod “llifogydd cyflym neu ddwfn yn bosibl, a allai achosi perygl i fywyd".

Dywedodd llefarydd ar ran Arolwg Daearegol Prydain bod eu cofnodion yn awgrymu y gallai glaw o’r fath arwain at dirlithriadau.

Mae rhybudd melyn am law hefyd ar draws Cymru gyfan heblaw am Sir y Fflint o oriau mân y bore ddydd Llun nes 03.00 ddydd Mawrth.

Gallai dydd Llun nodi "ddigwyddiad arwyddocaol" oherwydd bod y tir eisoes yn wlyb iawn, meddai'r Swyddfa Dywydd.

Hyd yn hyn, mae Cymru wedi gweld tua 240mm o law ym mis Tachwedd o’i gymharu â’r cyfartaledd o 162mm, yn ôl un o'i meteorolegwyr.

Dywedodd uwch feteorolegydd gweithredol y Swyddfa Dywydd, Marco Petagna: “Mae pob ardal wedi gweld mwy o law na’r arfer.

“Mae llawer o ardaloedd yng Nghymru a Lloegr eisoes wedi gweld glaw ymhell uwchlaw'r arfer ac mae rhagor i ddod.”

Dywedodd llefarydd ar ran Arolwg Daearegol Prydain: “Mae cofnodion yn dangos bod glaw tebyg i’r hyn sy’n cael ei ragweld ar gyfer dydd Llun wedi achosi tirlithriadau yng Nghymru yn y gorffennol.

“Gallai llethrau naturiol a seilwaith gael eu heffeithio, gyda glaw yn disgyn ar lethrau sy’n debygol o fod eisoes yn wlyb iawn.”

Mae’r rhybudd tywydd oren yn berthnasol i’r siroedd canlynol:

• Blaenau Gwent
• Pen-y-bont ar Ogwr
• Caerffili
• Caerdydd
• Sir Gaerfyrddin
• Ceredigion
• Merthyr Tudful
• Sir Fynwy
• Castell-nedd Port Talbot
• Casnewydd
• Sir Benfro
• Powys
• Rhondda Cynon Taf
• Abertawe
• Torfaen
• Bro Morgannwg