Fe gafodd arbenigwyr eu galw i geisio achub bywyd morfil o rywogaeth hynod o brin a gafodd ei ddarganfod ar draeth Bae Trearddur yn Ynys Môn.

Mae yna lai nag 20 o gofnodion o’r Morfil Sberm Lleiaf wedi cael eu gweld yn nyfroedd y DU, meddai elusen Marine Life Rescue.

Mae’r morfil fel arfer yn cael ei ddarganfod mewn dyfroedd dwfn mewn moroedd trofannol yn unig.

Fe gafodd Timau Achub Gwylwyr y Glannau o Gaergybi a Rhosneigr eu galw i gynorthwyo’r creadur nos Iau.

Image

Yn anffodus, roedd gan yr anifail benywaidd ifanc 1.7m o hyd anafiadau sylweddol ar draws ei phen, ei chorff corff, ei hesgyll a'i chynffon.

Roedd ei maint yn awgrymu ei bod hi o bosibl yn dal i fod yn llo oedd yn ddibynnol ar ei mam, meddai’r achubwyr.

“Gwnaed y penderfyniad mai'r canlyniad mwyaf caredig oedd difa’r morfil i atal dioddefaint pellach,” meddai Marine Life Rescue.

“Hyd yn hyn, nid oes unrhyw forfilod o’r rhywogaeth hon wedi'u hail-arnofio'n llwyddiannus yn y DU ac Iwerddon, gan eu bod yn aml eisoes mewn iechyd gwael pan maen nhw’n cael eu canfod.”

Lluniau gan Marine Life Rescue,