Mae undeb Unite wedi rhybuddio y gall penderfyniad gan aelodau i weithredu’n ddiwydiannol mewn ffatri ym Melfast yn arwain at brinder Guinness dros y Nadolig.

Er hynny mae cwmni Diageo, sy’n cynhyrchu’r ddiod, wedi dweud bod cynlluniau ar waith i sicrhau nad yw archfarchnadoedd yn rhedeg yn sych.

Er i Guinness gael ei fragu yn Nulyn, mae’r ddiod yn cael ei gosod mewn caniau yn y ffatri ar Stryd Marshalls, Belfast, yng Ngogledd Iwerddon.

Dywedodd undeb Unite fod 90 o weithwyr wedi cytuno i streicio am gyfnod o wyth diwrnod o 5 Rhagfyr ymlaen o ganlyniad i “gynnig tâl anfoddhaol” oedd yn llai na’r hyn a gynigwyd i weithwyr ffatri yn Runcorn yng ngogledd-orllewin Lloegr.

Bydd y streic yn “tarfu’n ddifrifol ar linellau cynhyrchu yn y cyfnod cyn y Nadolig”, meddai swyddog rhanbarthol Unite, Michael Keenan.

Ond dywedodd llefarydd ar ran Diageo mewn datganiad na fydd “unrhyw darfu ar gyflenwad Guinness nac ar Guinness 0.0 dros gyfnod y Nadolig”.

“Mae gennym gynlluniau wrth gefn i reoli unrhyw effaith bosibl yn ein safle pecynnu caniau yn Belfast,” meddai.

“Rydym yn siomedig gyda chanlyniad y bleidlais o blaid gweithredu diwydiannol yn ein safle pecynnu caniau yn Belfast.

“Rydym yn credu’n gryf mai parhau i drafod yw’r ffordd orau o sicrhau datrysiad sy’n cydnabod cyfraniad gwerthfawr gweithwyr, gan sicrhau cystadleurwydd hirdymor y safle.”