Fe fydd ceiswyr lloches yn cael eu hatal rhag defnyddio tacsis ar gyfer apwyntiadau meddygol o fis Chwefror ymlaen, yn ôl cyhoeddiad gan y lywodraeth y DU.

Daw'r cyhoeddiad ar ôl i ymchwiliad gan y BBC ganfod bod rhai pobl wedi teithio pellteroedd hir mewn tacsis ar bwrs y wlad, gydag un ceisiwr lloches yn dweud ei fod wedi mynd ar daith 250 milltir mewn tacsi i weld meddyg teulu, gan gostio £600 i'r Swyddfa Gartref.

Mewn ymateb, fe lansiodd y llywodraeth adolygiad brys, i edrych ar ddefnydd a chostau tacsis i drosglwyddo ceiswyr lloches o'u gwestai i apwyntiadau ym mis Medi.

Nawr, mae'r llywodraeth wedi cadarnhau eu bod wedi gwario tua £15.8 miliwn dros y flwyddyn ar gludiant meddygol i geiswyr lloches.

Ond dywedodd yr Ysgrifennydd Cartref, Shabana Mahmood fod hyn nawr yn mynd i newid.

Dywedodd Ms Mahmood: "Rwy'n dod â'r defnydd digyfyngiad o dacsis gan geiswyr lloches ar gyfer apwyntiadau ysbyty i ben, a dim ond yn yr amgylchiadau mwyaf eithriadol bydd teithiau o'r fath yn cael eu hawdurdodi.

"Byddaf yn parhau i gael gwared ar wastraff arian wrth i ni gau pob un 'gwesty lloches'."

Dywedodd Ms Mahood hefyd fod y llywodraeth Lafur wedi "etifeddu contractau Ceidwadol drud."

Mae gweinidogion wedi dweud eu bod eisiau gweld ceiswyr lloches yn defnyddio dewisiadau fel trafnidiaeth gyhoeddus i deithio yn y DU.

Bydd rhai eithriadau yn parhau, fydd yn cynnwys ceiswyr lloches sydd ag anableddau corfforol, salwch cronig neu anghenion sy'n gysylltiedig â beichiogrwydd, ond fe fydd yn rhaid i'r Swyddfa Gartref gymeradwyo'r ceisiadau o dan y rheolau newydd.

Roedd ystadegau'r Swyddfa Gartref ar gyfer 30 Medi yn dangos bod 99 o geiswyr lloches yn ymgartrefu dros dro mewn gwestai yng Nghymru. 

Roedd y cyfan o'r rheini yng Nghaerdydd, gyda'r un ohonynt yn awdurdodau lleol eraill Cymru.