Bydd miloedd o awyrennau cwmni Airbus yn gorfod cael diweddariad meddalwedd cyn gallu hedfan eto, ar ôl i'r cwmni ddarganfod fod peryg y gallai ymbelydredd solar ymyrryd â chyfrifiaduron yr awyrennau.

Mae'n debyg bod tua 6,000 o awyrennau Airbus A320 wedi’u heffeithio gan y broblem, sydd tua hanner maint fflyd fyd-eang y cwmni o Ffrainc, ond mae'r rhan fwyaf o'r awyrennau wedi gallu hedfan eto o fewn ychydig oriau ar ôl diweddaru'r feddalwedd.

Dywedodd rheoleiddiwr awyrennau yn y DU y byddai “rhywfaint o darfu a chanslo hediadau” er bod yr effaith mewn meysydd awyr yn ymddangos yn gyfyngedig.

Dywedodd Airbus eu bod wedi darganfod y broblem ar ôl ymchwiliad i ddigwyddiad lle collodd awyren (oedd yn hedfan rhwng America a Mecsico) uchder yn sydyn ym mis Hydref.

Fe wnaeth yr hediad gan gwmni JetBlue Airways, lanio ar frys yn Florida, ac fe gafodd o leiaf 15 o bobl ar fwrdd yr awyren eu hanafu.

Yn ogystal â’r awyren A320, sef awyren fwyaf poblogaidd y cwmni, mae’r un broblem hefyd wedi effeithio ar fodelau'r A318, A319 ac A321 cwmni Airbus.

Mae gan Airbus ffatri fawr ym Mhenarlâg yn Sir y Fflint, sy'n gyfrifol am gynhyrchu adenydd ar gyfer eu hawyrennau, ac yn un o gyflogwyr mwyaf yr ardal.

Mae'r cwmni wedi dweud ei bod yn bosib cwblhau'r diweddariad meddalwedd yn gymharol sydyn, ac mewn rhai achosion o fewn tair awr yn unig.