Mae tymor y Cymru Premier JD yn parhau wedi cyfnod o saib ar gyfer penwythnos trydedd rownd Cwpan Cymru JD.

Ac am benwythnos oedd hi hefyd wrth i deiliaid y cwpan, Y Seintiau Newydd gael eu gyrru allan o’r gystadleuaeth, yn ogystal â Chei Connah.

Mae’r canlyniadau yn golygu am y tro cyntaf ers 13 o flynyddoedd fydd y rownd derfynol eleni ddim yn cynnwys unai’r Seintiau Newydd neu Cei Connah.

Ond yn ôl at y gynghrair a gyda pum gêm i fynd tan yr hollt dim ond Y Seintiau Newydd sydd wedi selio eu lle yn yr hanner uchaf gyda’r pencampwyr naw pwynt yn glir ar frig y gynghrair.

31 pwynt yw’r swm arferol sydd ei angen i gyrraedd y Chwech Uchaf, ac mae Pen-y-bont wedi pasio’r targed hwnnw tra bod Caernarfon a Chei Connah yn dynn ar eu sodlau.

Yng nghanol y tabl, dim ond dau bwynt sy’n gwahanu Met Caerdydd (6ed), Y Barri (7fed) a’r Bala (8fed) yn y ras i gyrraedd y Chwech Uchaf a bydd dau o’r clybiau rheiny yn cyfarfod brynhawn Sadwrn.

Ac yn y frwydr i osgoi’r cwymp mi fydd hi’n ornest hollbwysig rhwng Llansawel a’r Fflint gan mae dim ond pwynt sy’n gwahanu’r timau rheiny.

Dydd Sadwrn, 29 Tachwedd

Bae Colwyn (5ed) v Pen-y-bont (2il) | Dydd Sadwrn – 14:30

Mae Bae Colwyn a Pen-y-bont wedi camu ymlaen yn gyfforddus i bedwaredd rownd Cwpan Cymru JD ar ôl buddugoliaethau o 3-1 yn erbyn Caerfyrddin a Cambrian o Gynghrair y De.

Gyda hanner clybiau’r uwch gynghrair wedi methu â chyrraedd y bedwaredd rownd, yn cynnwys y ddau enillwyr diwethaf, sef Y Seintiau Newydd a Chei Connah, bydd Bae Colwyn a Pen-y-bont yn gweld Cwpan Cymru fel llwybr realistig i gyrraedd Ewrop y tymor hwn.

Does neb wedi ildio llai o goliau na Bae Colwyn yn y Cymru Premier y tymor hwn (0.9 gôl y gêm), ac mae’r Gwylanod ar y trywydd cywir i hawlio lle’n y Chwech Uchaf yn eu tymor cyntaf ers esgyn yn ôl i’r uwch gynghrair.

Caernarfon oedd y clwb diwethaf i gyrraedd y Chwech Uchaf yn eu tymor cyntaf ar ôl ennill dyrchafiad, a hynny yn nhymor 2018/19.

Er colli tair o’u pum gêm gynghrair ddiwethaf, mae Pen-y-bont yn weddol saff o gyrraedd y Chwech Uchaf am y pumed tro mewn chwe tymor. 

Mae Pen-y-bont wedi ennill eu tair gêm ddiwethaf yn erbyn Bae Colwyn yn cynnwys buddugoliaeth o 1-0 yn Stadiwm Dragonbet ym mis Medi diolch i gôl Jac Clay.

Record cynghrair diweddar: 

Bae Colwyn: ͏➖✅❌✅❌

Pen-y-bont: ͏❌❌✅❌✅

Llanelli (12fed) v Cei Connah (4ydd) | Dydd Sadwrn – 14:30

Roedd hi’n benwythnos siomedig i Llanelli a Chei Connah wrth i’r ddau glwb gael eu gyrru allan o Gwpan Cymru yn y drydedd rownd.

Roedd hi’n grasfa o 6-0 i Lanelli yn erbyn Y Barri, tra bo Cei Connah wedi eu curo o 2-1 gan geffylau blaen Cynghrair y Gogledd, Llandudno.

Dyma’r tro cyntaf ers 12 mlynedd i Gei Connah golli yn nhrydedd rownd Cwpan Cymru, ac roedd John Disney yn rhwystredig bod rhediad y Nomadiaid o wyth gêm heb golli wedi dod i ben.

Ar ôl cipio pwynt yn erbyn Caernarfon yn eu gêm gynghrair ddiwethaf bydd y golled o 6-0 yn erbyn Y Barri yn ergyd drom i Lanelli sydd wyth pwynt o dan diogelwch y 10fed safle.

Mae’r Nomadiaid wedi ennill eu 11 gornest flaenorol yn erbyn Llanelli, yn cynnwys buddugoliaeth o 3-0 ar Gae y Castell ym mis Hydref.

Record cynghrair diweddar: 

Llanelli: ❌❌❌❌➖

Cei Connah: ✅✅➖✅✅

Llansawel (9fed) v Y Fflint (11eg) | Dydd Sadwrn – 14:30

Mae’n bosib dadlau mae hon yw gêm fwya’r penwythnos gan mae dim ond pwynt sy’n gwahanu Llansawel yn y 9fed safle, a’r Fflint yn safleoedd y cwymp.

Dyw Llansawel heb chwarae ers Tachwedd y 7fed pan enillodd y Cochion o 2-0 yn erbyn Y Bala gan sicrhau eu buddugoliaeth gyntaf gartref yn y gynghrair y tymor hwn.

Dyw’r Fflint m’ond wedi ennill dwy o’u 11 gêm gynghrair ddiwethaf (vs Llanelli a Llansawel), a dyw carfan Lee Fowler m’ond wedi ennill unwaith oddi cartref yn y gynghrair y tymor hwn (vs Llanelli).

Mae gan Y Fflint record ragorol yn erbyn Llansawel gan nad yw’r Sidanwyr wedi colli dim un o’u pum gornest yn erbyn y Cochion (ennill 4, cyfartal 1).

Mae amddiffynnwr a capten Y Fflint, Harry Owen yn amlwg yn mwynhau chwarae’n erbyn Llansawel gan iddo sgorio chwech o goliau mewn pum gêm yn erbyn tîm Andy Dyer.

Harry Owen sgoriodd y ddwy gôl yn erbyn Llansawel yn y gêm gyfatebol ar Gae y Castell y tymor hwn, gyda’r Fflint yn ennill o 2-1 ym mis Medi.

Record cynghrair diweddar: 

Llansawel: ͏✅❌❌❌✅

Y Fflint: ✅❌❌➖❌

Y Bala (8fed) v Met Caerdydd (6ed) | Dydd Sadwrn – 14:30

Met Caerdydd yw’r clwb i’w wylio ar hyn o bryd gyda’r myfyrwyr wedi ennill saith o’u naw gêm ddiwethaf, yn cynnwys dwy fuddugoliaeth yn olynol yn erbyn Y Seintiau Newydd.

Ar ôl gyrru’r Seintiau allan o’r gwpan, bydd Met Caerdydd yn anelu i fynd yr holl ffordd eleni a cael eu dwylo ar y tlws am y tro cyntaf yn eu hanes.

Met Caerdydd sy’n dechrau’r penwythnos yn y 6ed safle, a gyda momentwm ar ochr carfan Ryan Jenkins bydd criw Campws Cyncoed yn benderfynol o gyrraedd yr hanner uchaf am y pedwerydd tymor o’r bron.

Mae’r Bala wedi cyrraedd y Chwech Uchaf ym mhob un o’r 11 tymor diwethaf, ond mae perygl i’r clwb fethu’r nod eleni am y tro cyntaf ers tymor 2013/14.

Sgorio goliau yw prif broblem Y Bala, gan mae dim ond Llanelli (0.5 gôl y gêm) sydd wedi rhwydo llai na thîm Steve Fisher yn y gynghrair y tymor hwn (0.7 gôl y gêm).

Mae Met Caerdydd ar rediad o chwe gêm heb golli yn erbyn Y Bala, a dyw’r myfyrwyr m’ond wedi colli un o’u 12 gornest ddiwethaf yn erbyn Hogiau’r Llyn (ennill 6, cyfartal 5).

Record cynghrair diweddar:

Y Bala: ❌➖✅❌❌

Met Caerdydd: ͏✅➖✅❌✅

Bydd uchafbwyntiau’r gemau ar gael ar wefannau cymdeithasol Sgorio a’r gorau o gyffro’r penwythnos ar S4C nos Lun.