Mae Cyfoeth Naturiol Cymru wedi cyhoeddi dau rybudd llifogydd difrifol nos Wener wrth i Storm Claudia daro'r wlad.

Mae'r rhybuddion llifogydd difrifol ar yr Afon Mynwy, yn Forge Road yn Osbaston a hefyd Ynysgynwraidd.

Mae 10 o rybuddion llifogydd eraill mewn grym, yn y de ddwyrain a Phowys, a 32 o rybuddion i fod yn barod am lifogydd ar draws gweddill Cymru.

Fe allai rhai ardaloedd yng Nghymru gael eu taro gan “werth mis o law o fewn 24 awr” meddai'r Swyddfa Dywydd.

Mae yna ddau rybudd oren yn effeithio ar Gymru ddydd Gwener a dau rybudd melyn, wrth i Storm Claudia daro.

Mae un rhybudd oren yn berthnasol i siroedd Sir Fynwy a Phowys rhwng hanner dydd a hanner nos ddydd Gwener.

Mae ail rybudd oren i Flaenau Gwent, Caerffili, Caerdydd, Merthyr Tudful, Sir Fynwy, Casnewydd, Powys, Rhondda Cynon Taf a Thorfaen yn ystod yr un cyfnod.

Mae’r Swyddfa Dywydd yn rhybuddio am lifogydd a “allai beryglu bywyd,” achosi difrod i adeiladau, a llifogydd ar y ffyrdd.

Mae yna gyfyngiadau cyflymder o 30mya mewn grym ar Bont Britannia i'r ddau gyfeiriad rhwng Ynys Môn a'r tir mawr fore dydd Gwener oherwydd gwyntoedd cryfion.

Mae rhai teithiau fferi o Ddulyn i Gaergybi, yn ogystal â theithiau rhwng Abergwaun yn Sir Benfro a Rosslare yn Iwerddon hefyd wedi eu ganslo oherwydd y tywydd garw. 

'Glaw eithriadol o drwm'

Dywedodd Sally Davies, Rheolwr Tactegol ar Ddyletswydd ar gyfer Cymru gyda Chyfoeth Naturiol Cymru:

"Disgwylir i Storm Claudia ddod â glaw parhaus a fydd yn symud yn araf ar draws Cymru gyfan, ond bydd yn eithriadol o drwm mewn rhannau o Dde-ddwyrain Cymru a Phowys. Gallai hyn arwain at lifogydd difrifol yn yr ardaloedd hyn.

“Rydym yn disgwyl i’r glaw trymaf ddisgyn yn is i lawr mewn dalgylchoedd dros yr ardaloedd hyn. O ganlyniad, nentydd a chyrsiau dŵr llai yn yr ardaloedd hyn sy’n wynebu’r perygl llifogydd uniongyrchol mwyaf heddiw a thros nos.

“Mae yna berygl llifogydd hefyd o afonydd sy’n ymateb yn arafach wrth i law ddisgyn yn uwch i fyny yn y dalgylch. O ganlyniad, mae’n bosib y byddwn yn dal i weld yr effeithiau dros y dyddiau nesaf ac rydym yn erfyn ar bawb i gymryd y rhybuddion wirioneddol o ddifri.

“Bydd amodau gyrru wrth i bobl deithio adref o’r gwaith heddiw yn arbennig o beryglus. Os ydych chi allan, cymerwch ofal arbennig a pheidiwch byth â gyrru na cherdded trwy lifddwr."

Dywedodd Prif Feteorolegydd y Swyddfa Dywydd, Matthew Lehnert y bydd Cymru a rhannau o Loegr yn cael eu taro’n wael gan law rhwng dydd Gwener a dydd Sadwrn. 

'Mis o law'

“Bydd y glaw yn symud yn araf, ac mewn rhai ardaloedd gallai gymaint â mis o law ddisgyn o fewn 24 awr yn unig," meddai.

Mae’n rhybuddio y byddai’r glaw yn cwympo ar dir sydd eisoes wedi’i wlychu, gan gynyddu’r perygl o lifogydd. 

Dywedodd y gallai hyd at 150mm o law gwympo mewn rhai ardaloedd wrth i Storm Claudia, a gafodd ei henwi gan Wasanaeth Meteorolegol Sbaen, ddod â glaw trwm all barhau hyd at ddydd Sadwrn. 

Ychwanegodd y byddai gwyntoedd cryfion yng ngogledd-orllewin Cymru “hefyd yn berygl ychwanegol, gyda gwyntoedd o 60–70 milltir yr awr yn bosibl.” 

Fe fydd rhybudd melyn am wynt yn berthnasol i siroedd Ynys Môn, Gwynedd, Conwy, Ceredigion a Phowys, sydd hefyd yn berthnasol rhwng hanner dydd a hanner nos dydd Gwener.

Mae ail rybudd melyn am law rhwng 06:00 ddydd Gwener a 06:00 ddydd Sadwrn yn berthnasol i bob sir yng Nghymru heblaw am Ynys Môn, Ceredigion a Sir Benfro.