Mae dau ddyn yn eu chwedegau wedi eu cyhuddo o droseddau rhyw hanesyddol mewn cyn ganolfan blant yn y Fenni, Sir Fynwy rhwng yr 1970au a'r 1990au.

Yn ôl Heddlu Gwent, mae'r ddau ddyn, rhyngddyn nhw, wedi eu cyhuddo o 45 o droseddau honedig, sy'n gysylltiedig ag 16 dioddefwr.  

Digwyddodd y troseddau rhyw a chorfforol honedig yn bennaf yng Nghanolfan Asesu Coed Glas. 

Mae Angus Riddell, 69 oed, o Gwmbach, Rhondda Cynon Taf, wedi ei gyhuddo o 38 o droseddau, yn cynnwys tri achos o ymosodiad anweddus ar ferch o dan 16 oed, ac un achos o geisio ymosod yn anweddus ar ferch o dan 16 oed. 

Mae'r cyhuddiadau hefyd yn cynnwys 14 achos o ymosod yn anweddus ar fachgen o dan 14 oed, ac 20 achos o ymosod, esgeuluso, achosi dioddefaint neu anaf i berson ifanc. 

Mae Robin Griffiths, 65 oed , o Lyn Ebwy, Blaenau Gwent, wedi ei gyhuddo o saith achos o ymosod yn anweddus ar fachgen o dan 14 oed. 

Cafodd y ddau ddyn eu cyhuddo ddydd Gwener, 20 Mehefin, yn ôl Heddlu Gwent. 

Maen nhw wedi eu rhyddhau ar fechnïaeth a bydd y ddau yn ymddangos yn Llys Ynadon Casnewydd ar 3 Gorffennaf. 

Cafodd y dynion eu harestio yn rhan o Ymgyrch Spinney. 

Mae'r ymchwiliad hwnnw gan yr heddlu wedi bod yn canolbwyntio ar honiadau gan ddynion a menywod am gamdriniaeth ryw a chorfforol yn erbyn plant, yn bennaf yn yr hen ganolfan asesu.

Hen Gyngor Sir Gwent oedd yn gyfrifol am ganolfan Coed Glas cyn iddi gau yn 1995.