Mae dyn wedi cael ei ddedfrydu i garchar am oes am lofruddio "nain hyfryd" 69 oed yn ei chartref yn Y Rhyl. 

Fe wnaeth Dean Mears, 34, dorri i fewn i gartref Catherine Flynn ar Ffordd Cefndy ar 24 Hydref y llynedd. 

Cafodd Mears ei ddedfrydu i garchar am oes ddydd Gwener ac fe fydd yn rhaid iddo dreulio cyfnod lleiafswm o 27 mlynedd yn y carchar. 

Ar ôl methu â chael i fewn drwy'r drws, fe dorrodd Mears y ffenest flaen a dringo drwyddi. 

Gadawodd funudau yn ddiweddarach ar ôl llofruddio Catherine Flynn, a oedd yn byw yn yr eiddo. 

Image

Yn yr achos llys, fe wnaeth Mears gyfaddef dynladdiad ond fe wnaeth wadu iddo ei llofruddio. 

Wedi achos tair wythnos o hyd yn Llys y Goron Caernarfon, daeth y rheithgor i'r casgliad fod Dean Mears yn euog ym mis Mai.

Yn dilyn marwolaeth Mrs Flynn, dywedodd ei theulu ei bod hi'n "fam, nain, hen nain, modryb a chwaer hyfryd".

Wrth roi teyrnged i'w mam, dywedodd ei phlant, Natasha, Catherine a Michael: "Rydym ni'n methu ei gwên a'i hwyneb hyfryd, ei chalon glên a'i geiriau. 

"Roedd hi'n fam i unrhyw un oedd ei hangen, hi oedd y glud yn ein teulu. 

"Roedd hi ar ei hapusaf pan oedd pawb gyda'i gilydd, ac roedd hi'n caru ei phlant i gyd a'i hwyrion yn fwy na dim byd arall. 

"Doeddem ni ddim yn barod i golli un o'r bobl bwysicaf yn ein bywyd, ein Mam. Mae hi wedi mynd am byth."

'Colled drasig'

Dywedodd Deanne Mcginty o Wasanaeth Erlyn y Goron: "Fe ymosododd Dean Mears yn greulon ar Catherine Flynn yn ei chartref ei hun, lle y dylai fod wedi bod yn ddiogel.

"Fe wnaeth wedyn geisio cuddio'r gwir drwy gael gwared o dystiolaeth. 

"Fe wnaeth y rheithgor wrthod ei ymgais i hawlio cyfrifoldeb lleiedig ar ôl clywed yr holl dystiolaeth a gafodd ei chyflwyno gan Wasanaeth Erlyn y Goron. 

"Fe wnaeth gweithredoedd Mears arwain at golled drasig, ac mae'r golled honno yn cael ei theimlo i'r byw gan deulu a ffrindiau Catherine.

"Mae ein meddyliau yn parhau gyda nhw."

Ychwaengodd yr Uwcharolygydd Lee Boycott: “Symudodd Cathy i’r Rhyl 25 mlynedd yn ôl gyda’i thri o blant a ofalodd amdani’n ddiweddarach yn ei bywyd wrth iddi fynd yn hŷn. 

"Ar noson yr ymosodiad, roedd Cathy yn gorwedd yn ddiniwed yn ei gwely pan wnaeth Mears, a oedd yn ddiarth iddi, dorri drwy ffenest ei hystafell fyw. 

"Fe redodd i fyny'r grisiau ac ymosod arni yn ei hystafell wely lle y dylai hi fod wedi bod yn ddiogel.

"Bu farw Cathy 24 awr yn ddiweddarach gyda'i theulu o'i chwmpas."