Mae trais wedi bod ar strydoedd Ballymena yng ngogledd Iwerddon a hynny am yr ail noson.

Cafodd bomiau petrol a thân gwyllt eu taflu at blismyn gyda swyddogion yn ymateb gyda batonau plastig a chanon dŵr.

Yn ystod y noson cafodd ceir a rhai cartrefi eu rhoi ar dân.

Daw hyn yn dilyn golygfeydd tebyg nos Lun.

Ddydd Llun, roedd protest heddychlon wedi bod er mwyn dangos cefnogaeth at ferch ifanc a oedd wedi dioddef ymosodiad rhyw honedig yn yr ardal.

Mae dau fachgen 14 oed wedi ymddangos yn y llys wedi eu cyhuddo o geisio treisio.

Fe gafodd y cyhuddiadau eu darllen i'r ddau fachgen trwy gyfieithydd yn yr iaith Rwmaneg.  

Mae'r ddau yn gwadu'r cyhuddiad. 

Roedd arwyddion wedi eu gosod tu allan i rai tai yn datgan cenedligrwydd y rhai tu mewn gydag un yn dweud ' Cartref Prydeinig' ac un arall yn dweud 'Mae Ffilipino yn byw yma'.

Mae'r heddlu wedi dweud bod y trais wedi ei ysgogi gan hiliaeth.

Mae'r Prif Weinidog a gwleidyddion yng ngogledd Iwerddon wedi condemnio'r golygfeydd.