Mae dynes oedd ar gefn beic modur wedi marw mewn gwrthdrawiad ger Wrecsam brynhawn ddydd Sul.

Daeth adroddiadau am wrthdrawiad rhwng dau gerbyd ychydig wedi 13:00 ar yr A534 Ffordd Wrecsam, ar y gyffordd gyda Ffordd Barton Road, yn Holt.

Roedd Mercedes llwyd a beic modur Kawasaki glas yn y ddamwain.

Bu farw'r ddynes oedd yn teithio ar sêt gefn y beic modur yn y fan a'r lle.

Mae’r dyn oedd yn teithio ar sêt flaen y beic modur yn parhau yn yr ysbyty yn Stoke gydag anafiadau difrifol a allai newid ei fywyd.

Mae'r crwner wedi cael gwybod am y farwolaeth.

Dywedodd Sarjant Steve Richards o Uned Ymchwilio i Wrthdrawiadau Difrifol Heddlu'r Gogledd: “Rydym yn cydymdeimlo â theulu’r ddynes sydd wedi marw a phawb a fu’n ymwneud â’r achos. 

"Maen nhw bellach yn cael eu cefnogi gan swyddogion arbennigol.

“Mae ein hymholiadau’n parhau i sefydlu’r amgylchiadau llawn a gofynnir i unrhyw un a all gynorthwyo gyda’n hymchwiliad, nad yw eisoes wedi siarad â swyddogion, i gysylltu cyn gynted â phosibl.

"Dylai unrhyw un sydd â gwybodaeth gysylltu â swyddogion yn Uned Ymchwilio i Wrthdrawiadau Difrifol Heddlu Gogledd Cymru drwy’r wefan neu drwy ffonio 101, gan ddyfynnu rhif cyfeirnod 25000281482."