Lansio Apêl Daeargryn Myanmar yng Nghymru
03/04/2025
Mae grŵp o elusennau yng Nghymru wedi lansio apêl i helpu'r rhai sydd wedi eu heffeithio gan y daeargryn yn Myanmar.
Fe wnaeth y daeargryn, oedd yn mesur 7.7 ar y raddfa Richter, daro'r wlad fore Gwener diwethaf.
Erbyn hyn, y gred yw bod mwy na 2,800 o bobl wedi marw.
Bydd Pwyllgor Argyfyngau Brys (DEC) Cymru yn lansio Apêl Daeargryn Myanmar ddydd Iau.
Mae DEC yn dod â 15 o elusennau cymorth at ei gilydd ar adegau o argyfwng lle mae angen dyngarol sylweddol.
Mae'r elusennau'n cynnwys Oxfam, Achub y Plant a'r Groes Goch Brydeinig.
Bydd cynrychiolwyr o'r elusennau yn cwrdd ag Ysgrifennydd y Cabinet dros Gyfiawnder Cymdeithasol, y Trefnydd a’r Prif Chwip Jane Hutt ym Mae Caerdydd.
Ar hyn o bryd mae rhyfel cartref yn y wlad, rhwng y llywodraeth filwrol, grwpiau gwrthryfelwyr a’r lluoedd arfog.
O achos grym y daeargryn, fe gafodd Gwlad Thai hefyd ei heffeithio.
Yn Bangkok, prifddinas Gwlad Thai, roedd yn rhaid i filoedd adael adeiladau a gafodd eu difrodi.
