Gêm bêl-droed yn hollti barn cefnogwraig Kazakhstan a'i gŵr o Gymru

21/03/2025

Fe fydd Cymru'n herio Kazakhstan ar ddechrau eu hymgyrch ragbrofol Cwpan y Byd 2026 yng Nghaerdydd nos Sadwrn, ac i un cwpl o Wynedd fe fydd y ddau dîm yn cael eu cefnogi ar y noson.

Bydd Malika Jones, sydd o Kazakhstan yn wreiddiol, yn mynd i wylio’r gêm gyda'i gŵr Gareth Jones, sy’n Gymro.

Mae Malika a Gareth yn “edrych ymlaen yn arw” at y gêm, er y gwahaniaeth fydd rhwng y ddau am pa dîm i'w gefnogi.

Cafodd Malika ei magu yn Almaty, Kazakhstan tan iddi droi’n 18, cyn mynd ymlaen i astudio yn y brifysgol yn Prague lle wnaeth hi gyfarfod Gareth.

Maen nhw bellach wedi bod yn byw yn Bontnewydd, Caernarfon, ers pedair blynedd gyda’u plant, Osian ac Alun.

Malika Jones a'i meibion — Mae Malika a'i gŵr, Gareth, wedi bod yn byw ym Montnewydd ers pedair blynedd. *(Llun: Malika Jones)*

Ers iddyn nhw briodi saith mlynedd yn ôl, mae Malika wedi “pigo’r iaith i fyny yn hollol naturiol”, er i’r Gymraeg fod “yn gwbl newydd, cwbl wahanol i be’ mae Mali wedi arfer ei siarad.” meddai Gareth.

“Mae hi’n siarad Rwsieg a Kazak, yn ogystal â saith iaith arall”.

Yn ôl Gareth, mae eu hogiau ifanc yn “ymwybodol iawn o’u cenedlaetholdeb ddeuol” ac yn “falch iawn o fod yn Gymry ac yn Kazak.”

Cymraeg yw eu hiaith gyntaf, ond maen nhw’n dysgu Rwsieg a Kazak hefyd.

Malika Jones a Gareth Jones — Mae Malika wedi gallu “pigo’r iaith i fyny yn hollol naturiol” yn ôl ei gŵr. *(Llun: Malika Jones)*

Mae Gareth wedi teithio i Kazakhstan bedair gwaith yn y gorffennol, ac mae’n disgrifio’r wlad fel un “wahanol iawn i Gymru”.

“Ma’i mor fawr, mor eang ac mae’r mynyddoedd yna’n ddipyn mwy na be sy’ ‘na yng Nghymru” meddai.

Malika Jones a Gareth Jones yn Kazakhstan — Mae Kazakhstan 130 gwaith yn fwy na Chymru. *(Llun: Malika Jones)*

Kazakhstan ydy’r nawfed wlad fwyaf yn y byd, ac mae wedi ei lleoli yng nghanolbarth Asia rhwng Rwsia a Tsieina.

Mae 15% o’r wlad yn rhan o Ewrop, ac felly mae Kazakhstan yn cael bod yn rhan o UEFA.

“Dwi’n hoffi byw yn Cymru, dwi’n caru Cymru, ond Kazakhstan ydi adra i fi” meddai Malika.

Bydd Malika, Gareth a’u dau o blant yn mynd i wylio’r gêm yn Stadiwm Dinas Caerdydd nos Sadwrn; Malika i gefnogi Kazakhstan a Gareth i gefnogi Cymru.

“’Da ni’n edrych ymlaen yn arw i gael bod yn y stadiwm ddydd Sadwrn - Mali efo’i fflag Kazak dros ei ‘sgwyddau a finna’n rhan o’r Wal Goch yng nghrys Cymru” meddai Gareth.

Mae’r hogiau hefyd wedi bod yn dysgu anthem genedlaethol Kazakhstan.

Newyddion diweddaraf

Newyddion