Mae Eluned Morgan wedi cyhoeddi neges Dydd Gŵyl Dewi am y tro cyntaf fel Prif Weinidog Cymru.

Dywedodd Ms Morgan, a gafodd ei phenodi'n Brif Weinidog ym mis Awst y llynedd, ei bod yn dymuno diwrnod cenedlaethol hapus.

Yn ei neges ddydd Sadwrn, mae hi'n addo parhau â'r gwaith i "greu Cymru gryfach, tecach a gwyrddach".

"Dwi wedi addo byddwn ni’n parhau â'n gwaith i greu Cymru gryfach, tecach a gwyrddach," meddai.

"Lle mae pawb yn cael ei gwerthfawrogi, a neb yn cael ei adael ar ôl.

"A lle gall ein pobl ifanc gyflawni pob uchelgais, heb feddwl bod angen mynd i ffwrdd i gael dyfodol llwyddiannus.

"Dyma’r gwerthoedd a ddysgwyd i ni gan Dewi Sant ei hun."

Fe aeth Ms Morgan ymlaen i annog pobl i wneud y "pethau bychain".

"Ble bynnag rydych chi'n dathlu Dydd Gŵyl Dewi eleni, helpwch ni i droi'r byd yng Nghymru.

"A beth am i ni wneud rhywbeth bach i wella diwrnod rhywun arall?

"Dydd Gŵyl Dewi Hapus i chi gyd – mwynhewch!"

Ms Morgan yw chweched Prif Weinidog Cymru a'r fenyw gyntaf yn y swydd.

Fe gymrodd yr awenau oddi wrth Vaughan Gething, a ymddiswyddodd ym mis Gorffennaf 2024.