Mewn datganiad nos Fawrth, dywedodd Mr Evans: “Rydw i wedi cytuno gyda'r BBC y byddaf yn cymryd seibiant am beth amser o fy sioe radio a'r daith Strictly, yn ogystal ag ymrwymiadau cyhoeddus eraill, er mwyn blaenoriaethu materion yn ymwneud â lles fy iechyd

Dywedodd y byddai'n cymryd amser i hunan fyfyrio. 

“Mae'n wir ddrwg gen i am y loes mae fy ngweithredoedd amhriodol wedi ei achosi," meddai. 

“Rwy'n ymddiheuro hefyd i'r rhai na chaiff weld gweddill fy mherfformiadau, ac rwy'n ddiolchgar am y gefnogaeth anhygoel rydw i wedi ei derbyn gan y giang ar y daith.”

Sylwadau 'amhriodol'

Dros y penwythnos, ymddiheurodd Wynne Evans am  sylwadau "amhriodol ac annerbyniol" ganddo yn ystod lansiad taith Strictly ar 16 Ionawr.  

Cafodd fideo ei ffilmio yn ystod y digwyddiad. 

Yn y darn fideo, mae modd clywed Wynne Evans yn gwneud sylw amhriodol o natur rywiol.

Dywedodd llefarydd ar ran taith fyw Strictly a BBC Studios ar y pryd: “Nid oeddem yn ymwybodol o’r sylw o’r blaen ac ni chawsom unrhyw gwynion.

“Rydym wedi ei gwneud yn glir iawn i Wynne nad ydym yn goddef ymddygiad o’r fath ar y daith.”

Bu Wynne Evans yn y penawdau hefyd rai misoedd yn ôl, pan roedd cyfres deledu Strictly yn cael ei darlledu. 

Yn ddiweddarach, dywedodd y canwr fod yr ymateb i “jôc wirion” y gwnaeth yn ystod y gystadleuaeth  yn “dorcalonnus”.

Cafodd clipiau ohono a Katya Jones eu rhannu, gyda channoedd o wylwyr ar y cyfryngau cymdeithasol yn awgrymu nad oedd eu partneriaeth yn fêl i gyd.

Roedd y cyntaf yn dangos Katya Jones yn anwybyddu ymdrech gan Wynne Evans i roi ‘pawen lawen’ iddi, a’r ail yn ei dangos yn gwthio ei law oddi ar ei chanol.

Dywedodd y partneriaid yn ddiweddarach ar y cyfryngau cymdeithasol mai “jôc wirion” ydoedd, a bod y ddau yn “ffrindiau go iawn”.

Ddydd Llun, cadarnhaodd BBC Cymru bod Mr Evans yn cymryd seibiant o gyflwyno ei raglen ar orsaf BBC Radio Wales.

Cafodd pennod gyntaf y gyfres All At Sea, sydd yn cynnwys Mr Evans a’r actores Joanna Page, ei darlledu ar BBC One yng Nghymru nos Lun.