Mae dyn 19 oed wedi marw ar ôl i’w gar gael ei daro gan goeden yn ystod Storm Éowyn.

Roedd y dyn ifanc yn gyrru ger Mauchline, Dwyrain Swydd Ayr yn yr Alban, fore Gwener pan ddigwyddodd y gwrthdrawiad tua 6.45 ddydd Gwener.

Roedd hynny cyn i'r rhybudd tywydd coch yn yr ardal ddod i rym am 9.00.

Cafodd ei gludo i Ysbyty Athrofaol y Frenhines Elizabeth yn Glasgow ond bu farw ddydd Sadwrn.

Nid yw'r llanc wedi cael ei enwi.

Dywedodd yr heddlu: “Digwyddodd y gwrthdrawiad tua 6.45am ddydd Gwener, 24 Ionawr, 2025 ar y B743 ac roedd yn ymwneud â Ford Focus glas.

“Cafodd y gyrrwr, dyn 19 oed, ei gludo i Ysbyty Athrofaol y Frenhines Elizabeth yn Glasgow am driniaeth. Bu farw ddydd Sadwrn, 25 Ionawr.”

Ychwanegodd y Rhingyll Chris McColm o’r Uned Plismona’r Ffyrdd: “Mae ein meddyliau gyda theulu a ffrindiau’r dyn fu farw.”