Mae'r gêm rhwng Y Bala a Chaernarfon yn y JD Cymru Premier ddydd Sadwrn wedi ei symud i Landudno.

Cafodd y gêm ei gohirio deirgwaith o fewn 10 diwrnod o achos gwynt, glaw a thywydd gaeafol ym Maes Tegid yn y Bala.

Ar ôl cael ei gohirio ar ddyddiad gwreiddiol y gêm, sef 31 Rhagfyr, cafodd y gêm ei gohirio unwaith eto ar 3 Ionawr oherwydd bod y cae ym Maes Tegid wedi rhewi.

Cafodd y gêm ddarbi ei hail-drefnu ar gyfer nos Fawrth 7 Ionawr - ond ar ôl i'r tymheredd ostwng unwaith eto, cafodd y gêm ei gohirio am y trydydd tro mewn 10 diwrnod oherwydd bod y cae wedi rhewi.

Mae'r gêm bellach wedi ei hail-drefnu ar gyfer dydd Sadwrn 11 Ionawr am 12.45 - ac y bydd yn cael ei dangos yn fyw gan Sgorio.

Mae'r ail-drefnu wedi cael sgil effeithiau ar weddill gemau'r penwythnos, a hynny ar gyfnod tyngedfennol yn y Cymru Premier.

Yn wreiddiol, roedd dydd Sadwrn 11 Ionawr wedi ei neilltuo ar gyfer y gemau olaf cyn hollt y gynghrair.

Roedd hyn yn golygu fod pob tîm yn chwarae'r un pryd, fel nad oedd unrhyw dîm yn derbyn mantais o wybod beth oeddent eu hangen er mwyn cyrraedd safle penodol.

Ond gan fod y gêm rhwng Bala v Caernarfon wedi ei wthio i'r penwythnos hwn, mae'n golygu bydd sawl gêm oedd wedi'u trefnu ar gyfer ddydd Sadwrn, bellach yn cael eu chwarae nos Fawrth 14 Ionawr.