Mae dyn 25 oed wedi cael ei garcharu am wyth mlynedd am dreisio ac ymosod yn rhywiol ar blentyn.

Cafodd Ryan Russell ei ddedfrydu yn Llys y Goron yr Wyddgrug ddydd Mawrth.

Bydd yn treulio wyth mlynedd o dan glo a thair blynedd ar drwydded.

Plediodd yn euog i 14 o droseddau, gan gynnwys dau gyhuddiad o dreisio plentyn yn Sir y Fflint.

Roedd y troseddau eraill yn cynnwys dau gyhuddiad o ymosodiad rhywiol a phedwar cyhuddiad o gymryd rhan mewn gweithgaredd rywiol gyda phlentyn.

Roedd y ferch yn 12 oed pan ddigwyddodd y drosedd gyntaf, a dywedodd wrth yr heddlu bod y ddau wedi cyfarfod ar ap Snapchat.

Cyfaddefodd Russell hefyd iddo annog ail ferch i gymryd rhan mewn gweithgaredd rywiol, tri chyhuddiad o wneud delweddau anweddus a meddu ar ddelweddau pornograffig eithafol.

Wedi iddo gael ei arestio, datgelodd gwaith ymchwil bod bron i 200 o ddelweddau anweddus o'r categori mwyaf difrifol ar ei ffôn.

Dangosodd data Snapchat hefyd fod Russell wedi bod yn sgwrsio â nifer o ferched dan oed ar y platfform hwnnw.

Dywedodd y Ditectif Gwnstabl Ben Franklin o Heddlu Gogledd Cymru: “Er na fydd y ddedfryd heddiw’n dileu’r niwed a’r trallod i’r dioddefwr a’i theulu, rwy’n gobeithio y bydd yn rhoi rhywfaint o gysur o wybod na all neb arall gael eu niweidio bellach.

“Hoffwn hefyd ei chanmol am ei dewrder wrth adrodd y troseddau oedd mor ddifrifol, ac am ei dewrder trwy gydol yr ymchwiliad.

“Rwy’n gobeithio y bydd hyn yn annog dioddefwyr eraill ac yn rhoi hyder iddynt y bydd Heddlu Gogledd Cymru yn ymdrechu i ymchwilio i drais yn erbyn menywod a merched a dod â throseddwyr o flaen eu gwell.”