Mae dau fachgen yn eu harddegau wedi eu harestio ar ôl ymosodiad difrifol ar ferch 12 oed yn Y Barri, Bro Morgannwg dros y penwythnos.

Cafodd Heddlu De Cymru eu galw i ardal ger maes parcio Heol yr Harbwr ar Ynys y Barri o gwmpas 17.00 ddydd Sul wedi adroddiad am ymosodiad.

Fe gafodd y ferch ei chludo i Ysbyty Athrofaol Cymru yng Nghaerdydd gydag anafiadau difrifol. Nid yw ei hanafiadau yn peryglu ei bywyd, yn ôl y llu.

Mae dau fachgen lleol, 13 a 15 oed, wedi eu harestio ar amheuaeth o achosi niwed corfforol difrifol ac maen nhw'n parhau yn y ddalfa. 

Mae’r bachgen ieuengaf hefyd wedi ei arestio ar amheuaeth o fod â gwrthrych miniog yn ei feddiant.

Mae ymchwiliad yr heddlu yn parhau.

Dywedodd y Ditectif Arolygydd Phil Marchant, o Heddlu De Cymru, bod y ferch yn adnabod y ddau fachgen sydd o dan amheuaeth.

“Yn ddealladwy, bydd y digwyddiad hwn, gan ysytyried oedran y rhai dan sylw, yn achosi pryder yn y gymuned,” meddai.

“Cafodd y ddau eu harestio o fewn awr, ac ar hyn o bryd nid ydym yn chwilio am unrhyw un arall mewn cysylltiad â’r ymosodiad.”

Llun: Heol yr Harbwr, y Barri (Google Maps)