Newyddion S4C

Cymru Premier JD: Y Seintiau Newydd i herio Cei Connah

Sgorio 30/10/2024
Chwaraewyr Cei Connah yn dathlu sgorio yn erbyn Llansawel

Gyda thair gêm wrth gefn, fe allai Y Seintiau Newydd ddringo i’r ail safle petai nhw’n curo Cei Connah nos Fercher.

Dyw pethau heb fynd yn berffaith i’r pencampwyr ar ddechrau’r tymor, ond ar ôl rhediad o bum buddugoliaeth yn olynol ym mhob cystadleuaeth mae’n ymddangos bod cyfnod sigledig y Seintiau wedi dod i ben.

Mae Cei Connah yn dal i fod yn y nawfed safle, ond dyw’r Nomadiaid heb golli yn eu pedair gêm gynghrair ddiwethaf gan ildio dim ond unwaith yn ystod y rhediad hwnnw.

Hon fydd y gêm gyntaf rhwng y clybiau ers i Gei Connah guro’r Seintiau Newydd o 2-1 yng Nghasnewydd yn rownd derfynol Cwpan Cymru JD 2023/24.

Ond dyw’r Nomadiaid ddim wedi curo’r Seintiau Newydd mewn gêm gynghrair ers Ebrill 2021 gyda’r Seintiau’n ennill wyth a chael tair gêm gyfartal yn yr 11 gornest ddiwethaf rhwng y timau yn y Cymru Premier JD.

Record cynghrair diweddar:

Cei Connah: ͏❌✅➖➖✅

Y Seintiau Newydd: ✅❌✅✅✅

Bydd uchafbwyntiau’r gêm ar gael ar wefannau cymdeithasol Sgorio.

Newyddion diweddaraf

Mae'r wefan hon yn defnyddio cwcis i sicrhau eich bod chi'n cael y profiad gorau ar ein gwefan.