Mae Heddlu Sir Gaerhirfryn wedi ymddiheuro ar ôl difa ci XL bully mewn camgymeriad.  

Cafodd yr anifail anwes o'r enw Bruno ei ddifa, tra roedd ei berchnogion yn y broses o wneud cais i'w eithrio o'r ddeddf sy'n ei gwneud yn drosedd i fod yn berchen ar XL bully.

Mewn datganiad, dywedodd Heddlu Sir Gaerhirfryn fod Bruno wedi ei ddifa oherwydd "camgymeriad gweinyddol". 

“Fis Awst, fe wnaethon ni gasglu ci XL bully o gyfeiriad ym Morecambe yn rhan o'n pwerau o dan y Ddeddf Cŵn Peryglus, gan fod cŵn XL Bully wedi eu gwahardd ,” meddai'r datganiad.  

“Roedd dogfen yn cael ei pharatoi er mwyn ystyried a ddylai'r perchennog gael ei erlyn.

“Ond yn anffodus, oherwydd camgymeriad gweinyddol, cafodd y ci ei ddifa cyn y gwrandawiad llys.”

Ychwanegodd y llu eu bod wedi cyflwyno proses er mwyn "sicrhau na fydd yr un camgymeriad yn digwydd eto". 

Dywedodd Aelod Seneddol Morecambe a Lunesdale, Lizzi Collinge wrth y BBC ei bod yn dymuno atebion. 

“Rydw i wedi cysylltu'n uniongyrchol â'r heddlu am hyn,” meddai.

“Cefais sioc o glywed fod Bruno - anifail anwes a oedd yn cael ei garu gan ei deulu - wedi ei ddifa mewn camgymeriad tra yng ngofal yr heddlu.

“Mae proses gyfreithiol yn ei lle pan fo cŵn o dan ofal yr heddlu, ac mae'n ymddangos na chafodd y broses honno ei gweithredu.   

“Byddaf yn parhau i gefnogi'r teulu, ac rwy'n galw ar yr heddlu i ddatgelu sut y byddan nhw yn newid eu harferion, er mwyn sicrhau na fydd hyn yn digwydd eto.”

Llun Llyfrgell - ci XL Bully