Mae dyn 52 oed wedi cael ei garcharu am 10 mlynedd ar ôl ymosod ar ddynes yn ei chartref ar Ynys Môn.

Fe wnaeth y ddynes 70 oed redeg o'i chartref yng Nghaergybi yn gweiddi am help wedi i ddyn ei deffro ac ymosod arni.

Clywodd Llys y Goron Caernarfon fod Carl Reed, 52, wedi cymryd cyffuriau cyn iddo osod y ddynes, oedd yn gweithio fel nyrs, ar ei gwely a'i bygwth.

Dywedodd yr erlynydd Richard Edwards fod y tŷ wedi cael ei dargedu ym mis Mawrth y llynedd. 

Cafodd y ddynes ei dyrnu yn ei phen dro ar ôl tro ac fe gafodd DNA Reed ei ddarganfod ar fenyg a crowbar. 

Fe wnaeth Reed gyfaddef i ymosod gyda bwriad o ladrata ac fe gafodd gyfnod trwydded estynedig o bedair blynedd fel rhan o'i ddedfryd. 

Roedd ganddo 74 o droseddau ar ei record, gan gynnwys tri lladrad. 

Dywedodd y barnwr Nicola Saffman fod ei ddioddefwr diweddaraf "wedi ei brawychu" ac yn dioddef sawl pwl o banig parhaus. 

Ychwanegodd y barnwr: "Dwi'n derbyn bod gennych chi anhwylder personoliaeth sy'n anodd i'w drin yn llwyddiannus."

Dywedodd y Ditectif Gwnstabl Leslie Ellis: "Roedd y ddynes yn aelod poblogaidd o'r gymuned, a weithiodd yn ddewr fel nyrs am fwy na 30 mlynedd cyn ymddeol. 

"Roedd ganddi bersonoliaeth hwyliog ac yn mwynhau bywyd, ond ers y digwyddiad, mae ei hiechyd yn parhau i gael ei effeithio yn ddifrifol. 

"Does dim geiriau i ddisgrifio gweithredoedd Carl Reed, maent wedi cael effaith ofnadwy ar ei bywyd."