Mae dyn o Gilgwri wedi cael rhybudd gan farnwr i “baratoi ar gyfer dedfryd o garchar” ar ôl iddo gyfaddef achosi marwolaeth dyn o Wynedd drwy yrru’n beryglus.

Fe blediodd Roger Brenninkmeyer, 60, o Neston yn euog yn Llys y Goron Caernarfon ddydd Iau i achosi marwolaeth Droy Darroch-York drwy yrru cerbyd BMW yn beryglus ar y B4354 ym Mhentreuchaf ger Pwllheli.

Bu farw Mr Darroch-York ar 4 Mehefin 2022 yn dilyn y gwrthdrawiad.

Fe glywodd cwest i'w farwolaeth ei fod wedi marw yn y fan a'r lle o ganlyniad i anafiadau i'w ben ar ôl i'w gar droi drosodd.

Ar ran yr amddiffyniad, fe ofynnodd Mark Haslam am "adroddiad seiciatrig" cyn y dedfrydu.

Mae Brenninkmeyer wedi ei ryddhau ar fechnïaeth, ac mae bellach wedi'i wahardd rhag gyrru.

Fe rybuddiodd y Barnwr Timothy Petts ef: “Dylech baratoi ar gyfer dedfryd o garchar.”

Ychwanegodd: “Ar ôl darllen y papurau gallaf weld yr angen am adroddiad seiciatrig. Rydych chi'n gwybod bod yn rhaid iddo fod yn ddedfryd o garchar."

Bydd yn cael ei ddedfrydu ar 27 Tachwedd.