Dau gerddwr a gyrrwr car fu farw ger pier Biwmares

29/08/2024

Dau gerddwr a gyrrwr car fu farw ger pier Biwmares

Mae Newyddion S4C ar ddeall mai dau gerddwr a gyrrwr fu farw mewn gwrthdrawiad ym Miwmares ddydd Mercher.

Mae ymchwiliadau yn parhau wedi'r digwyddiad yn y dref ar Ynys Môn.

Cafodd Heddlu Gogledd Cymru iddyn eu galw i stryd Alma am 14.45 ddydd Mercher wedi adroddiadau am wrthdrawiad.

Mae ymchwiliad ar y gweill i geisio darganfod union amgylchiadau'r gwrthdrawiad.

Roedd dau ambiwlans awyr, nifer o geir yr heddlu a sawl injan dân yn bresennol ger ardal y pier, ar ôl i swyddogion gau rhan o'r ffordd.

Dywedodd y Prif Arolygydd Caroline Mullen-Hurst o Heddlu Gogledd Cymru: “Gallwn gadarnhau bod tri o bobl wedi marw. Ry'n ni'n apelio ar unrhyw un a welodd y digwyddiad nad sydd eisioes wedi siarad â'r heddlu, i gysylltu â ni."

Dywedodd Ifan Jones, a oedd yn yr ardal adeg y gwrthdrawiad, iddo weld car yn taro wal ac iddo glywed swn 'bang' mawr.

"Odd pawb yn rhedeg tuag at scene y digwyddiad," meddai.

Wrth siarad â rhaglen Newyddion S4C, dywedodd AS Plaid Cymru dros Ynys Môn, Llinos Medi: “Mae e’n drychineb, mae ‘di ysgwyd y gymuned ym Miwmares ag ar yr Ynys i gyd.

“Mae rhywun yn cydymdeimlo’n ddwys gyda’r teuluoedd sydd wedi eu heffeithio a phawb oedd yn yr ardal ar y pryd hefyd achos mae ‘na nifer o bobol sydd wedi gwirfoddoli a jyst ymgymryd â’r tasgau yno yn ystod yr argyfwng yna.”

Hefyd yn ymateb i'r digwyddiad ar y cyfryngau cymdeithasol, dywedodd y cyn-AS Ceidwadol Ynys Môn, Virginia Crosbie, ei bod yn "meddwl ac yn gweddïo am y dioddefwyr, eu teuluoedd a'u hanwyliaid sydd wedi cael eu heffeithio."

Mae arweinydd Plaid Cymru, sydd hefyd yn aelod o’r Senedd dros Ynys Môn, Rhun ap Iorwerth, wedi ymateb i’r digwyddiad: “Mae hyn yn newyddion torcalonnus ac mae fy nghydymdeimlad gyda’r rheiny sydd wedi eu heffeithio, yn ogystal â’u hanwyliaid.

“Rwy’n ddiolchgar i’r gwasanaethau brys am eu hymateb prydlon.”

Cadarnhaodd y gwasanaeth ambiwlans awyr fod un o'u hofrenyddion wedi ei anfon yno toc wedi 3 o'r gloch, a bod eu gwaith wedi ei gwblhau yno erbyn 4.30 yp.

Mae’r heddlu yn gofyn i bobl osgoi’r ardal am y tro gan y bydd y ffordd ar gau am beth amser. Mae modd i unrhyw un sydd â gwybodaeth gysylltu â'r heddlu drwy ffonio 101 gan ddyfynnu'r cyfeirnod Q129825.”