Mae dyn ifanc yn yr ysbyty gydag anafiadau allai newid ei fywyd ar ôl gwrthdrawiad yn ystod oriau mân y bore yn y Mwmbwls, Abertawe.

Yn ôl yr heddlu, roedd y dyn 22 oed yn cerdded yn yr ardal pan gafodd ei daro gan gar Kia Rio gwyn tua 01:10 y tu allan i siop y Co-Op. 

Roedd y car yn teithio o gyfeiriad Pier y Mwmbwls i ardal Newton.

Mae'r heddlu yn cynnal ymchwiliad, ac mae disgwyl i ran o Ffordd y Mwmbwls rhwng Church Park Lane a Dunns Lane barhau ar gau tan tua 13:00 ddydd Llun.

Mae swyddogion yn apelio am dystion i'r gwrthdrawiad ac yn awyddus i siarad â phobl sydd â lluniau cylch cyfyng. 

Mae modd i unrhyw un sydd â gwybodaeth gysylltu â'r llu drwy ddyfynnu'r cyfeirnod 2400285581.