Disgyblion ar draws Cymru i dderbyn eu canlyniadau TGAU
22/08/2024
Disgyblion ar draws Cymru i dderbyn eu canlyniadau TGAU
Bydd miloedd o ddisgyblion ar draws Cymru yn derbyn eu canlyniadau TGAU ddydd Iau.
Eleni oedd y flwyddyn gyntaf i Gymru ddychwelyd i lefelau graddio arholiadau cyn pandemig Covid-19.
Roedd canlyniadau TGAU yng Nghymru y llynedd 'hanner ffordd' rhwng y rhai a gafodd eu dyfarnu yn 2019 a 2022.
2019 oedd y flwyddyn olaf cyn y pandemig, a 2022 y flwyddyn gyntaf i ddisgyblion sefyll arholiadau wrth i Gymru ddod allan o’r pandemig.
Fe gafodd 300,409 o raddau TGAU eu dyfarnu y llynedd, sydd yn llai na 2022 ond yn fwy nag yn 2019.
Roedd 21.7% o'r graddau TGAU yng Nghymru yn radd A/7 neu'n uwch, tra bod 64.9% yn C/4 neu'n uwch ac roedd 96.9% yn G/1 neu'n uwch.
Roedd 9% o'r graddau TGAU i bobl ifanc 16 oed yn raddau A*, 22% yn A* neu A a 65.6% yn raddau A*-C.
Cafodd canlyniadau Safon Uwch yng Nghymru eu cyhoeddi ddydd Iau diwethaf.
Fe wnaeth y graddau uchaf ar gyfer canlyniadau Safon Uwch yng Nghymru ostwng am y drydedd flwyddyn yn olynol.
Roedd canran y graddau A ac A* yn 29.9% eleni, o gymharu â 34% yn 2023.
Er y gostyngiad, mae'r canlyniadau'n parhau i fod yn uwch na chyn cyfnod pandemig Covid-19, pan roedd canran y graddau A-A* yn 26.5%.
