Mae’r swyddfa dywydd wedi cyhoeddi rhybudd ar gyfer glaw trwm a mellt a tharanau i rannau o Gymru cyn diwedd yr wythnos.

Bydd y rhybudd tywydd yn effeithio ar rannau o ddwyrain y wlad, gan ymestyn o’r gogledd i’r de, brynhawn ddydd Iau.

Daw wrth i Gymru fwynhau cyfnod o dywydd hafaidd, clir gyda disgwyl i'r tymheredd gyrraedd dros 20 gradd Celsius ddyddiau Llun, Mawrth a Mercher.

“Mae cawodydd trwm a stormydd mellt a tharanau yn debygol ar draws rhannau o Gymru a Lloegr brynhawn Iau,” meddai llefarydd ar ran y Swyddfa Dywydd. 

“Mae union leoliad y cawodydd yn dal yn ansicr a bydd rhai lleoedd yn aros yn sych drwy'r dydd. 

“Fodd bynnag, lle mae'r cawodydd yn digwydd gallent fod yn drwm, gyda pheryg hefyd y bydd mellt, cenllysg a gwyntoedd cryfion.

“Gallai'r cawodydd trymaf arwain at 20-30 mm o law o fewn awr, gyda chymaint â 70-90 mm lle mae nifer o gawodydd yn syrthio yn yr un lleoliad dros gyfnod o 24 awr.”

Siroedd

Ar fore Llun roedd disgwyl i’r rhybudd effeithio ar y siroedd canlynol ddydd Iau:

• Blaenau Gwent
• Pen-y-bont ar Ogwr
• Caerffili
• Caerdydd
• Sir Ddinbych
• Sir y Fflint
• Merthyr Tudful
• Sir Fynwy
• Castell-nedd Port Talbot
• Casnewydd
• Powys
• Rhondda Cynon Taf
• Torfaen
• Bro Morgannwg
• Wrecsam