Mae adeilad S4C ar faes y Sioe Frenhinol yn cael ei ail enwi yn ‘Corlan Dai Llanilar’ ddydd Mawrth er cof am y darlledwr.

Fe fuodd Dai Jones, oedd yn ffermwr, cyflwynydd ac yn ganwr amlwg farw yn 78 oed ym mis Mawrth 2022.

Roedd yn cyflwyno sawl rhaglen adnabyddus ar y radio a theledu, ond mae’n cael ei gofio’n bennaf fel cyflwynydd y gyfres Cefn Gwlad.

Dywedodd Sioned Wiliam, Prif Weithredwr Dros Dro S4C: “Mae’r penderfyniad i alw adeilad S4C ar faes Sioe Frenhinol Cymru yn Corlan Dai Llanilar wedi bod yn un rhwydd a naturiol iawn i’w gwneud.

“Roedd Dai Jones yn un o hoelion wyth y byd darlledu Cymraeg, a’i afiaith dros y Gymraeg, darlledu Cymraeg ac hefyd dros gefn gwlad Cymru yn heintus.

“Rydym yn falch iawn fel S4C ein bod yn gallu coffau’r gŵr arbennig ac unigryw hwn mewn ffordd arbennig. Bydd y cenedlaethau i ddod hefyd yn gallu dysgu am Dai a chael eu hysbrydoli ganddo.”

‘Braint’

Bydd llechen yn cael ei dadorchuddio yn adeilad S4C am 10.45 gan gyfeirio at Dai fel y ‘Ffarmwr, Darlledwr, Gwladgarwr’.

Mae’r llechen yn cael ei chyflwyno gan Gymdeithas Amaethyddol Frenhinol Cymru ac yn cynnwys englyn gan y bardd Tudur Dylan Jones:

Dai
 

Dai’r ardal hyd y dalar, - Dai â’i lais

Hyd y wlad, Dai’r cymar,

Dai frenin ei werin wâr.

Llawn o hwyl yw Llanilar.

Dywedodd Aled Rhys Jones, Prif Weithredwr Sioe Frenhinol Cymru: "Byddai Dai yn dweud yn aml, y fraint fwyaf a ddaeth i’w rhan oedd cael ei ethol yn Llywydd y Gymdeithas. 

“Ac eleni, mae’n fraint i ni ddadorchuddio cofeb barhaol am un o fawrion y genedl. Roedd y Sioe yn golygu lot i Dai ac rydym yn cofio gyda gwen ar ein hwynebau am un o gewri cefn gwlad Cymru yr wythnos hon.”

Yn y derbyniad bydd gwasg Y Lolfa’n lansio cyfrol Cofio Dai, casgliad o ysgrifau wedi’u llunio gan y bobl oedd yn ei adnabod orau ym mhob rhan o’i fywyd. 

Roedd golygydd y gyfrol, Beti Griffiths, yn ffrind agos i Dai a’i weddw, Olwen.