Mae disgwyl cyhoeddiad mai Craig Bellamy fydd rheolwr newydd Cymru.

Dywedodd asiantaeth newyddion PA a'r BBC mai Bellamy yw dewis cyntaf Cymdeithas Bêl-droed Cymru i olynu Rob Page yn y swydd.

Craig Bellamy yw is-reolwr clwb pêl-droed Burnley ar hyn o bryd.

Dywedodd adran chwaraeon BBC Cymru eu bod ar ddeall fod Cymdeithas Bêl-droed Cymru yn y broses o gytuno ar gytundeb gyda Bellamy a Burnley ar y cyd. 

Y gred yw bod Bellamy wedi cyfarfod ag uwch swyddogion y gymdeithas yr wythnos diwethaf.

Fe ymddangosodd Bellamy 78 o weithiau i Gymru cyn ymddeol o bêl-droed rhyngwladol yn 2013.

Daeth yn agos at gael y swydd yn ôl yn 2018 cyn i Gymdeithas Bêl-droed Cymru benodi Ryan Giggs.

Canlyniadau siomedig

Fis diwethaf fe gyhoeddodd Cymdeithas Bêl-droed Cymru eu bod wedi dod a chytundeb Rob Page fel rheolwr tîm pêl-droed Cymru i ben. 

Roedd Page wedi bod o dan bwysau cynyddol wedi i Gymru gael canlyniadau siomedig yn eu gemau cyfeillgar diwethaf yn erbyn Gibraltar a Slofacia - gydag un gêm yn ddi-sgor, a cholli'n drwm yn yr ail gêm. 

Methodd Cymru â chyrraedd Pencampwriaeth Euro 2024 hefyd, wedi iddyn nhw golli yn erbyn Gwlad Pwyl yn rownd derfynol y gemau ail-gyfle ym mis Mawrth eleni. 

Llun gan Asiantaeth Huw Evans.