Mae heddlu ar Tenerife wedi penderfynu dod â'r chwilio am Jay Slater i ben.

Dywedodd llefarydd ar ran y Guardia Civil bod y chwilio wedi dod i ben bron i bythefnos ers iddo ddechrau.

"Mae'r chwilio wedi dod i ben ond mae'r achos yn parhau," meddai.

Ddydd Gwener roedd yr heddlu ar yr ynys wedi galw am wirfoddolwyr i gymryd rhan yn y chwilio, gan ganolbwyntio ar y ceunentydd a'r llwybrau o amgylch pentref Masca ym mharc cenedlaethol Rural de Teno.

Roedd Jay Slater, o Oswaldtwistle yn Sir Gaerhirfryn wedi teithio i’r ynys ar gyfer gŵyl gerddoriaeth ac ar ei wyliau cyntaf heb ei rieni.

Nid oes unrhyw un wedi clywed ganddo ers iddo ffonio ffrind toc cyn 09:00 ar ddydd Llun 17 Mehefin, yn dweud ei fod ar goll a bod angen dŵr arno.

Anghysbell

Fe welwyd Mr Slater ddiwethaf ar lwybr ar dir mynyddig ym mharc cenedlaethol Rural de Teno.

Mae ffrindiau a theulu Mr Slater wedi dweud ei fod wedi gadael y grŵp y bu'n teithio gyda nhw yn gynharach yn nhref Playa de las Americas yn ne’r ynys.

Ar ôl gadael gŵyl gerddoriaeth NRG yng nghlwb nos Papagayo, aeth i mewn i gar gyda dau ddyn roedd wedi eu cyfarfod i yrru i'r parc cenedlaethol yng ngogledd-orllewin Tenerife.

Y bore canlynol fe'i gwelwyd yn gofyn am amseroedd bws o'r pentref anghysbell, cyn iddo ddechrau cerdded i'r cyfeiriad anghywir oedd yn ei arwain i ffwrdd o Playa de las Americas.

Roedd ei rieni wedi teithio i'r ynys yn ystod y dyddiau diwethaf er mwyn cynorthwyo gyda'r ymdrech i ddod o hyd iddo.