Mae’r ymgeisydd gwleidyddol Claudia Sheinbaum wedi ei hethol yn arlywydd benywaidd cyntaf Mecsico.

Dywedodd awdurdod etholiadol swyddogol Mecsico fod canlyniadau rhagarweiniol yn dangos fod Ms Sheinbaum wedi ennill rhwng 58% a 60% o’r bleidlais yn yr etholiad ddydd Sul.

Mae Ms Sheinbaum yn wyddonydd amgylcheddol a chyn-faer Dinas Mecsico.

Ei phrif wrthwynebydd oedd y wraig fusnes Xóchitl Gálvez.

Bydd Ms Sheinbaum yn cymryd lle'r Arlywydd sy'n gadael, Andrés Manuel López Obrador, ar 1 Hydref.

Mae disgwyl i'r canlyniadau swyddogol gael eu cyhoeddi fore dydd Llun (amser Mecsico).

Bydd buddugoliaeth Ms Sheinbaum yn gam mawr i Fecsico, gwlad a fu am flynyddoedd yn gwthio gwerthoedd a rolau mwy traddodiadol i fenywod.

Ms Sheinbaum fyddai'r fenyw gyntaf i ennill etholiad cyffredinol yn yr Unol Daleithiau, Mecsico neu Ganada.

Ymgyrch treisgar

Mae pleidleiswyr hefyd wedi bod yn ethol aelodau o Gyngres Mecsico a llywodraethwyr mewn wyth talaith, yn ogystal â phennaeth llywodraeth Dinas Mecsico.

Mae’r ymgyrch wleidyddol wedi cael ei difetha gan ymosodiadau treisgar.

Yn ôl Llywodraeth Mecsico, mae mwy nag 20 o ymgeiswyr lleol wedi’u lladd ar draws y wlad. 

Er hynny, mae arolygon preifat yn honni fod hyd at 37 o ymgeiswyr wedi’u lladd.

Dywedodd swyddogion bod dau berson wedi’u lladd mewn dau ymosodiad ar orsafoedd pleidleisio yn nhalaith Puebla ddydd Sul.

Mae Ms Sheinbaum, a oedd yn rhedeg Dinas Mecsico yn 2018-23, wedi cael ei chefnogi gan Mr López Obrador.

Ni all Mr López Obrador, sydd wedi bod mewn grym ers 2018, gael ei benodi'n arlywydd unwaith eto.

O dan gyfansoddiad Mecsico, mae arlywyddion yn gyfyngedig i un tymor chwe blynedd.

Mae mwy o bobl wedi cael eu lladd - dros 185,000 - yn ystod arweinyddiaeth Mr López Obrador nag yn ystod unrhyw arweinyddiaeth arall yn hanes modern Mecsico, er bod y gyfradd lladdiadau wedi bod yn gostwng.

Mae Ms Sheinbaum wedi addo gwella diogelwch yn y wlad ond prin yw'r manylion ar hyn o bryd.