![Dihewyd gan Lleucu Ifans](https://ncms.s4c.org.uk/sites/default/files/styles/newyddion_large_square_1000x1000_/public/2024-05/Dihewyd%20Lleucu%20Ifans.jpg?itok=QFydcDwP)
Goleuni’r gogledd yn weledol eto’n ‘fuan’ medd arbenigwr
Bydd goleuni’r gogledd yn weledol unwaith eto yn y Deyrnas Unedig o fewn ychydig wythnosau, yn ôl arbenigwyr.
Cafodd y goleuadau - a elwir hefyd yn Gwawl y Gogledd neu Lewyrch yr Arth - eu gweld ar draws Cymru gyfan ddydd Gwener a Sadwrn yr wythnos diwethaf.
Mae stormydd geomagnetig yn digwydd pan fydd yr haul yn rhyddhau gronynnau wedi'u gwefru tuag at y Ddaear.
Dywedodd Krista Hammond o’r Swyddfa Dywydd y bydd yr un ochr bywiog o’r haul wedi troelli yn ôl i wynebu'r Ddaear mewn 10 i 12 diwrnod.
“Rydyn ni ar uchafbwynt solar ar hyn o bryd ac felly’n gweld mwy o frychau ar yr haul,” meddai.
“Mae yna fwy o dywydd gofodol ac felly mae aurora borealis i’w weld.”
![Dihewyd gan Lleucu Ifans](https://ncms.s4c.org.uk/sites/default/files/styles/newyddion_large_square_1000x1000_/public/2024-05/Dihewyd%20Lleucu%20Ifans.jpg?itok=QFydcDwP)
Ond dywedodd y byddai yn annhebygol bod yr aurora mor gryf ag yr wythnos diwethaf.
“Roedd yr amgylchiadau yn unigryw iawn y penwythnos diwethaf,” meddai.
“Mae’n annhebygol y bydd yr un brychau ar yr haul yn gwneud yr un peth eto.
“Fyddwn i ddim yn synnu pe bai’n dod o gwmpas a bod rhywfaint o weithgaredd arno, ond rwy’n amau na fydd hynny’n cael ei ailadrodd.”