Mae gyrrwr beic modur wedi marw wedi gwrthdrawiad ar yr A4064 ym Mhontycymer.

Dywedodd Heddlu De Cymru eu bod nhw’n apelio am dystion i’r gwrthdrawiad oedd yn ymwneud â beic modur KTM 125cc oren. 

“Er gwaethaf ymdrechion y tîm meddygol yn y fan a'r lle, cyhoeddwyd bod gyrrwr y beic modur wedi marw ychydig yn ddiweddarach,” medden nhw.

“Mae teulu’r gyrrwr yn cael cymorth gan swyddogion sydd wedi’u hyfforddi’n arbennig.”

Roedd y ffordd ar gau am rai oriau.

Dywedodd yr heddlu eu bod nhw am gael gwybod gan unrhyw un a allai fod wedi gweld y gwrthdrawiad neu a allai fod â lluniau camera cerbyd.