Disgrifiodd ei fam yr eiliad pan ofynnodd am ei bwmp asthma ar ôl bod yn chwarae, cyn iddo droi'n las yn sydyn a stopio anadlu.  

Rhagor o weithredu

Wedi marwolaeth ei mab, mae Belinda Dowling o Portsmouth bellach yn galw am ragor o weithredu, er mwyn tynnu sylw at ddifrifoldeb y cyflwr. Mae'n dadlau nad oes "digon o ymwybyddiaeth am asthma." 

Yn ôl elusen Asthma and Lung UK, "bach iawn sydd wedi ei gyflawni" mewn degawd ers i adroddiad arwyddocaol gael ei gyhoeddi ym maes asthma.

Roedd y ddogfen honno yn nodi bod modd atal mwyafrif y marwolaethau yn sgil asthma, gan gynnig camau y dylid eu gweithredu er mwyn atal rhagor o farwolaethau. 

'Syfrdanol' 

Yn ôl yr elusen, mae mwy na 12,000 o bobl yn Y Deyrnas Unedig wedi marw ar ôl cael pwl gwael o asthma ers i'r adroddiad hwnnw gael ei gyhoeddi.  

Mae'n ychwanegu ei bod yn "syfrdanol bod cyn lleied wedi newid." 

Roedd Warren yn un o saith o blant.

“Maen nhw'n dweud y gall eich bywyd newid mewn eiliad, a doedden ni ddim yn ystyried pa mor wir oedd hynny," meddai ei fam Belinda Dowling.

“Roedd Warren gam amlaf yn ymdopi â'i asthma, ond unwaith neu ddwywaith y flwyddyn, byddai'n cael pwl gwael, a byddai angen iddo fynd i ysbyty, ac roedd hynny yn brofiad dychrynllyd. "  

“Ar un noson fis Mawrth y llynedd, ar ôl bod yn hollol iawn yn yr ysgol gydol y dydd, cyn chwarae yn hapus gyda'i frawd bach Cameron ar y trampolîn, dywedodd wrthai ei fod angen ei bwmp. Doedd y teclyn ddim yn gweithio a dechreuodd fynd i banig. Yna tra roeddwn i ar y ffôn yn galw am ambiwlans, fe drodd yn las a stopio anadlu.  

“Ceisiodd ei dad ei adfywio gyda CPR hyd nes i'r ambiwlans gyrraedd a'i gludo i 'r ysbyty, ond doedd dim oll y gellid ei wneud i'w achub.  

“Gofynnodd ei frawd Cameron sy'n saith oed wrthai yn ddiweddar, pam nad oedd Warren wedi dychwelyd ato i chwarae ar y trampolîn, ar ôl addo y byddai'n gwneud hynny.  

“Ni fu erioed ddigon o ymwybyddiaeth am beryglon asthma,"  meddai Mrs Dowling.

"Rydw i eisiau i bawb wybod pa mor beryglus yw'r cyflwr, a 'dw i ddim am i neb arall brofi ein hunllef ni. 

"Rwy'n gwybod y byddai Warren yn hapus iawn petai ei stori e yn helpu eraill." 

Mae Llywodraeth Cymru yn dweud eu bod wedi cyhoeddi dau gynllun gweithredu cenedlaethol yn y ddegawd ddiwethaf. Mae'r rhain yn golygu bod byrddau iechyd yn gallu cynllunio a gwella ansawdd a chysondeb y gofal iechyd sydd yn cael ei gynnig i gleifion gyda chyflyrau resbiradol. 

Yn ogystal maent yn dweud bod nifer y cleifion sydd wedi eu trin mewn brys ar gyfer asthma yng Nghymru wedi bod yn gostwng ers 2014-15.