Mae’n “siomedig” bod rhestrau aros ar gyfer triniaeth ysbyty yng Nghymru wedi mynd yn hirach unwaith eto yn ôl yr Ysgrifennydd Iechyd.

Yn ôl ystadegau a gyhoeddwyd ddydd Iau roedd tua 591,600 o gleifion unigol ar restrau aros am driniaethau yng Nghymru ym mis Chwefror, pan oedd ychydig dros 763,100 o lwybrau cleifion ar agor. Dyma’r ffigwr uchaf ar gofnod.

Mae nifer y llwybrau cleifion sy’n aros dros flwyddyn hefyd wedi cynyddu’n raddol yn ystod y misoedd diwethaf, meddai’r GIG.

Mae mae mwy o gleifion canser yn aros yn hirach i ddechrau eu triniaeth ddiffiniol gyntaf yn ogystal.

Wrth ymateb fe awgrymodd Eluned Morgan bod streiciau meddygon iau ym mis Chwefror wedi chwarae rhan yn y rhestrau aros hirach.

“Ym mis Chwefror, cafodd mwy na 14,000 o bobl y newyddion da nad oes ganddynt ganser,” meddai.

“Ond ym maes canser yn gyffredinol, rwy'n siomedig iawn bod perfformiad wedi gostwng yn erbyn y targed y mis hwn.

“Mae’n siomedig hefyd gweld bod y rhestr aros gyffredinol wedi cynyddu o ran maint ar ôl tair cwymp yn olynol, ond nid yw hyn yn syndod o ystyried y streic ym mis Chwefror.”

Ychwanegodd ei bod yn “siomedig i weld bod cynnydd wedi bod yn yr arosiadau hir mewn adrannau achosion brys”. 

“Rwy'n disgwyl i fyrddau iechyd ganolbwyntio o'r newydd ar leihau arosiadau hir mewn adrannau achosion brys, yn enwedig ar gyfer pobl eiddil ac oedrannus.”

Dywedodd llefarydd iechyd Plaid Cymru, Mabon ap Gwynfor bod y GIG yng Nghymru yn mynd am yn ôl “ar bob mesur”.

“Cafodd Llafur gyfle i bwyso’r botwm ailosod drwy ddewis Prif Weinidog a Chabinet newydd, ond fe benderfynon nhw fynd am fwy o’r un peth,” meddai.