Mae disgwyl cadarnhad ddydd Mercher mai Vaughan Gething fydd Prif Weinidog nesaf Cymru. 

Enillodd Mr Gething arweinyddiaeth Llafur Cymru ar ôl i'r canlyniad gael ei gyhoeddi ddydd Sadwrn.

Y ddau yn y ras oedd Jeremy Miles, y gweinidog dros addysg a’r Gymraeg, a Mr Gething, sydd wedi bod yn weinidog dros yr economi yng nghabinet Mark Drakeford.

Fe fydd Mr Gething yn olynu Mr Drakeford fel arweinydd y Blaid Lafur yng Nghymru, a'r disgwyl ydy y bydd yn bumed Prif Weinidog ar y wlad ddydd Mercher.

Ymddiswyddodd y prif weinidog presennol, Mark Drakeford, yn dilyn ei sesiwn gwestiynau olaf yn y Senedd ddydd Mawrth.

Caiff pleidlais ei chynnal i ddewis y Prif Weinidog newydd ddydd Mercher, gydag arweinydd Llafur Cymru, sydd â hanner y seddi yn y Senedd, bron yn sicr o'i hennill.

Bydd y canlyniadau’n cael eu cyhoeddi gan y Llywydd Elin Jones. Yna bydd y Llywydd yn anfon llythyr at y Brenin yn argymell penodi'r unigolyn.

Unwaith y bydd y Brenin yn rhoi sêl bendith bydd y Prif Weinidog newydd yn cymryd llw'r diwrnod hwnnw.

Cyhoeddodd Plaid Cymru y byddant yn enwebu eu harweinydd, Rhun ap Iorwerth, yn y bleidlais i ethol Prif Weinidog Cymru ddydd Mercher. 

Dywedodd Aelod Seneddol Dwyfor Meirionnydd, Liz Saville Roberts, y byddai'r blaid yn "cynnig y cyfle i Aelodau Llafur o'r Senedd sydd ag ystyriaethau moesegol i wneud y peth iawn."