Oriel luniau: Prifysgol Aberystwyth yn trechu Bangor yn Eisteddfod Ryng-golegol 2024

03/03/2024
Eisteddfod Ryn-gol 2024

Mae Prifysgol Aberystwyth wedi dod â rhediad buddugoliaethau Prifysgol Bangor i ben drwy ennill Eisteddfod Ryng-golegol 2024.

Roedd y coleg ar y bryn wedi ennill wyth Eisteddfod yn olynol cyn cael eu trechu eleni gan y coleg ger y lli.

Prifysgol Abertawe oedd wedi cynnal yr Eisteddfod eleni, a hynny am y tro cyntaf ers 2019, gyda dros 500 o fyfyrwyr yn cystadlu..

Nanw Maelor a Rebecca Rees o Brifysgol Aberystwyth enillodd y Gadair a’r Goron eleni.

Fe ddechreuodd y cystadlu yn Neuadd Fawr y Brifysgol ar Gampws y Bae fore Sadwrn, gyda’r cyflwynydd a chyn-fyfyrwraig Abertawe Siân Thomas yn Feistres y Ddefod.

Y comedïwr Noel James o Gwmtawe, a chyn-Swyddog Materion y Gymraeg Undeb Myfyrwyr Prifysgol Abertawe, Tom Kemp, oedd yn llywio’r diwrnod ac roedd yr aelod senedd Sioned Williams ymhlith y beirniaid.

Image
Aberystwyth yn cipio'r wobr
Aberystwyth yn cipio'r wobr

Dywedodd Elain Gwynedd, Llywydd Undeb Myfyrwyr Cymraeg Aberystwyth, eu bod nhw wedi gwirioni ar y fuddugoliaeth.

"Mae hi wir yn fraint i ni’n Aberystwyth gael ein coroni fel pencampwyr yr Eisteddfod Ryng-golegol eleni, a hithau’n flwyddyn arbennig wrth inni ddathlu hanner can mlynedd ers sefydlu UMCA," meddai.

"Dw i mor falch o’r holl aelodau am eu hymroddiad a’u hangerdd dros ddod â’r darian yn ôl i’r coleg ger y lli.

"Mi fuaswn i hefyd yn hoffi diolch i Arweinyddion a Chyfeilyddion Aelwyd Pantycelyn Dafydd, Mari, Fflur, Efa, Celt a Gwenno am eu holl waith caled wrth baratoi tuag at yr Eisteddfod.

"Diolch o galon hefyd i Brifysgol Abertawe am drefnu’r Eisteddfod ac am y croeso cynnes, yn wir bydd hi’n un sy’n aros yn y cof am byth. 

"Mae UMCA yn edrych ymlaen at groesawu’r Eisteddfod Ryng-gol i Aberystwyth yn 2025, gan obeithio y byddwn yn cipio’r wobr unwaith yn rhagor!"

 Y tabl pwyntiau terfynol:

  • Aberystwyth 651
  • Bangor 634
  • Abertawe 200
  • Caerdydd 142
  • Manceinion 20
Image
Nanw Maelor

Enillydd Cadair Rhyng-gol

Nanw Maelor, Prifysgol Aberystwyth

Image
Rebecca Rees

Enillydd Coron Rhyng-gol

Rebecca Rees, Prifysgol Aberystwyth

Enillwyr Twrnament Chwaraeon

Prifysgol Abertawe

Enillydd Tlws y Cerddor 

Celt John, Prifysgol Bangor

Enillydd Medal y Dysgwyr 

Ieuan Jacka, Prifysgol Abertawe

Enillydd y Fedal Gelf 

Nia Williams, Prifysgol Aberystwyth

Enillydd y Fedal Wyddoniaeth 

Fflur Edwards, Prifysgol Aberystwyth

Enillydd y Fedal Ddrama 

Kirsty Lewis, Prifysgol Bangor

Côr SATB

Prifysgol Bangor

Image
Abertawe
Myfyrwyr Prifysgol Abertawe
Image
Eisteddfod ryng-gol
Myfyrwyr Prifysgol Caerdydd 
Image
Eisteddfod ryng-gol
Image
Eisteddfod ryng-gol
Myfyrwyr Bangor
Image
Eisteddfod ryng-gol
Image
Eisteddfod ryng-gol

 Lluniau gan Brifysgol Abertawe.

Newyddion diweddaraf

Mae'r wefan hon yn defnyddio cwcis i sicrhau eich bod chi'n cael y profiad gorau ar ein gwefan.