Mae galwadau i ddarlledu gemau'r Chwe Gwlad ar sianeli di-dâl yn unig wedi cael eu gwrthod gan Lywodraeth y DU.

Daw'r penderfyniad yn dilyn pwysau gan ASau o Gymru i ychwanegu gemau'r bencampwriaeth i restr o chwaraeon sydd y cael eu cyfyngu i'w darlledu ar sianeli di-dâl.

Caiff y rhestr o ddigwyddiadau chwaraeon sydd wedi eu gwarchod ar gyfer sianeli di-dâl yn unig eu hadnabod fel rhestr 'Grŵp A'.

Ar y rhestr yma mae Cwpan y Byd pêl-droed, rownd derfynol Cwpan Rygbi'r Byd, y Gemau Olympaidd a rowndiau terfynol Wimbledon - ond ni fydd y Chwe Gwlad yn cael eu cynnwys.

'Colled'

Ym mis Hydref eleni fe wnaeth aelodau'r Pwyllgor Materion Cymreig alw am gynnwys y Chwe Gwlad yng Ngrŵp A y Gyfundrefn Digwyddiadau Rhestredig.

Ofer oedd y cais hwn, ac wrth ymateb i'r penderfyniad gan Lywodraeth y DU, dywedodd cadeirydd y Pwyllgor, yr AS Ceidwadol Stephen Crabb. bod rhywbeth "mewn perygl o gael ei golli" i Gymru.

"Er ein bod yn siomedig wrth gwrs nad yw Llywodraeth y DU yn teimlo bod angen diwygio'r digwyddiadau rhestredig i gynnwys y Chwe Gwlad, mae'r gefnogaeth gyffredinol y mae'n ei chynnig i'r sector ddarlledu yng Nghymru yn cael croeso cynnes," meddai.