Mae Nia Bennett wedi cael ei phenodi yn Gadeirydd newydd Urdd Gobaith Cymru. 

Mae hi'n olynu Dyfrig Davies, sydd yn rhoi'r gorau i'r rôl wedi chwe blynedd wrth y llyw. 

Wedi ei geni yn Bolton, fe gafodd Nia Bennett ei magu yn Llanfairpwll ar Ynys Môn.

Yn dilyn cyfnodau o fyw yn Aberystwyth, Y Felinheli a Brwsel, ymgartrefodd yng Nghaerdydd gan fagu tri o blant a gweithio ym maes Cynhwysiant ac Adnoddau Dynol cyn cael ei phenodi yn Gyfarwyddwr Corfforaethol. 

Mae bellach yn Gyfarwyddwr cwmni effectusHR.

Mae wedi bod yn aelod o Banel Adnoddau Dynol yr Urdd ers 2011 ac yn Gadeirydd y Panel ers 2018. 

Cafodd ei chyfethol fel aelod o Bwyllgor Gwaith Gweithredol yr Urdd gan Ymddiriedolwyr yr Urdd yn 2020, a chafodd ei hethol fel Ymddiriedolwr yn 2021.

Wrth siarad am ei phenodiad, dywedodd Nia Bennett: "Rwy’n awyddus i sicrhau bod yr Urdd yn gwbl gynhwysol, yn ymestyn ei gyrhaeddiad ac yn parhau i ddatblygu a gweithredu ar syniadau ein pobl ifanc. Drwy gynnig cyfleoedd i bawb - beth bynnag eu cefndir - i ehangu eu sgiliau a’u profiadau, rydym yn cyfrannu at ddatblygiad Cymry’r dyfodol, a thrwy hynny dyfodol Cymru.”

Cyhoeddodd y mudiad hefyd  bod dau aelod newydd wedi’u penodi yn Ymddiriedolwyr Ifanc yr Urdd, sef Deio Siôn Llewelyn Owen ac Emily Pemberton.

Ychwanegodd Prif Weithredwr yr Urdd Siân Lewis: "Rydym yn falch iawn o groesawu Nia Bennett i gadeirio Bwrdd yr Urdd ac i adeiladu ar y cyfraniad enfawr a wnaed gan Dyfrig Davies, sydd wedi cefnogi’r Urdd drwy newidiadau Llywodraethiant sylweddol. Hoffwn hefyd estyn croeso cynnes i Emily a Deio i Fwrdd Ymddiriedolwyr y Mudiad.

"Wrth i’r Urdd ddatblygu a ffynnu, mae’r penodiadau newydd hyn yn sicrhau ein bod yn parhau â’n taith o fod yn sefydliad blaengar. Mae amrywiaeth o safbwyntiau, ystwythder yn ein penderfyniadau ac ystod eang o sgiliau perthnasol yn hanfodol i gyflawni ein strategaeth ‘Urdd i Bawb’.