Mae rhybudd melyn am law trwm wedi ei gyhoeddi ar draws rhan helaeth o Gymru.

Mae’r rhybudd ddydd Mawrth a Mercher yn ymestyn o arfordir gogledd Cymru at Gaerdydd tua’r de.

Mae disgwyl llifogydd a bydd y glaw hefyd yn effeithio ar drafnidiaeth meddai'r Swyddfa Dywydd.

Bydd yn dechrau am 6.00 ddydd Mawrth ac yn dod i ben am 18.00 ddydd Mercher.

Bydd y rhybudd mewn grym yn:

• Blaenau Gwent
• Pen-y-bont ar Ogwr
• Caerffili
• Caerdydd
• Sir Gaerfyrddin
• Ceredigion
• Sir Conwy
• Sir Ddinbych
• Gwynedd
• Merthyr Tudful
• Sir Fynwy
• Castell-nedd Port Talbot
• Casnewydd
• Powys
• Rhondda Cynon Taf
• Abertawe
• Torfaen
• Bro Morgannwg

'36 awr'

“Bydd glaw a fydd yn drwm ar brydiau yn effeithio ar sawl rhan o’r DU ddydd Mawrth a Mercher,” meddai llefarydd ar ran y Swyddfa Dywydd.

“Bydd y glaw trymaf yn syrthio dros dir yng ngogledd orllewin Lloegr, gogledd orllewin Cymru a de Cymru.

“Dros gyfnod o 36 awr yn yr ardaloedd rheini mae 50-100mm o law yn debygol o syrthio, a chymaint â 150-200mm mewn rhai ardaloedd."