Ezra Collective sydd wedi dod i’r brig yng nghystadleuaeth Gwobr Mercury eleni gyda’i halbwm 'Where I’m Meant To Be'.

Dyma’r band jazz cyntaf i ennill y gystadleuaeth sydd yn cynnig gwobr o £25,000 ac yn dathlu albwm Brydeinig neu Wyddelig orau’r 12 mis diwethaf.

Roedd 12 albwm wedi cyrraedd y rhestr fer, ac ymhlith yr enwebiadau roedd Jessie Ware, J Hus, Arctic Monkeys, Fred Again a Rhoi.

First moments as Mercury Prize winners for @EzraCollective 🎉#MercuryPrize pic.twitter.com/Ih2mxka3WU

— Mercury Prize (@MercuryPrize) September 7, 2023

Wrth dderbyn y wobr mewn seremoni nos Iau, dywedodd y drymiwr Femi Koleoso fod y grŵp "yn cynrychioli rhywbeth arbennig iawn oherwydd ein bod wedi cyfarfod mewn clwb ieuenctid.

“Nid buddugoliaeth i Ezra Collective yn unig yw hwn, neu i jazz y DU, ond mae hon yn foment arbennig i bob un sefydliad ar draws y wlad sydd wedi rhoi ymdrech ac amser i bobl ifanc.”

Ymysg y 12 beirniad roedd y gyflwynwraig Sian Eleri.

Image

Wrth siarad ar raglen Aled Hughes ar BBC Radio Cymru fore Iau dywedodd y gyflwynwraig nad oedd hi’n gallu coelio’r cynnig o fod yn feirniad.

“Ferdai'm coelio pan ges i yr e-mail. Ma’n un o’r pethau ‘na lle ti’n dychmygu ella cael neud ffasiwn beth fel teenager,” meddai.

“Dwi’n cofio sbïo drwy restrau blynyddoedd yn nôl a mynd ‘w s'gwn ni pwy sy’n mynd i ennill, a neud predictions bach fy hun, dwi wedi bod wrth fy modd efo cerddoriaeth ers erioed. 

“Felly mae hwn gymaint o fraint, lle ma barn fi’n actually meddwl rhywbeth."