Mae'r band Ffa Coffi Pawb wedi gwireddu addewid eu henw o'r diwedd.

Maen nhw wedi nodi ail-lansiad eu trydydd albwm Hei Vidal! o 1992 drwy lansio blas coffi eu hunain mewn caffi yng Nghaerdydd.

Cafe Hard Lines a prif leisydd y band Gruff Rhys sydd wedi creu'r coffi i ddathlu'r lansiad.

Bydd Rhys Gruff yn cynnig paneidiau am ddim i bobl sy'n mynychu'r caffi yng Nghaerdydd o ddydd Gwener ymlaen.

'Twp'

Dywedodd y prif leisydd fod y syniad yn un amlwg.

"Mae Ffa Coffi Pawb yn cyfieithu i 'Coffee Beans for Everyone', ond mae ganddo ail ystyr Wenglish sydd yn seinegol yn golygu 'F**k Off Pawb'," meddai.

"Felly wrth ystyried y cyd-destun byddai'n dwp i beidio creu blas coffi i ddathlu ailgyhoeddi'r albwm."

Dyma'r tro cyntaf i'r albwm fod ar gael ar wasanaethau ffrydio, yr unig ffordd o wrando arni gynt oedd ar CD neu gopi gwreiddiol pan gafodd ei ryddhau yn 1992.