Roedd rhai cannoedd wedi ymgynnull yng Nghaernarfon ddydd Gwener ar ddiwrnod angladd dyn ifanc fu farw mewn gwrthdrawiad. 

Bu farw Joshua Lloyd Roberts, 19 oed, mewn gwrthdrawiad yng Nghaeathro ar 2 Mehefin. 

Fe wnaeth yr angladd ddechrau o’r Oval, cae pêl-droed Clwb Caernarfon gyda’r galarwyr yn gwisgo crysau pêl-droed.

Daeth cais gan y teulu cyn yr angladd i bobl wisgo crysau pêl-droed Cymru, Everton, Caernarfon, Bontnewydd a'r Gym-Gym.

Cafodd y gwasanaeth ei gynnal yn Eglwys Llanbeblig am 12.30.

Roedd Joshua Lloyd Roberts yn wreiddiol o Gaernarfon, ac yn fyfyriwr ym Mhrifysgol Metropolitan Caerdydd. 

Roedd yn gefnogwr brwd o dîm pêl-droed Cymru, ac yn aelod ffyddlon o’r Wal Goch.

Image

Image

Image

Image

Image

'Annwyl'

Yn dilyn ei farwolaeth fe wnaeth mam Josh, Melanie Tookey, ei ddisgrifio fel "person caredig a gofalgar.

"O'dd Josh yn un o’r pobl mwya' rhesymol fedrai ddweud mod i’n nabod," meddai.

"Bob tro'n edrych ar yr ochr iawn o petha. O'dd o ddim yn anghytuno efo pobl os o'dd o ddim yn licio nhw, os oeddon nhw'n gywir oedd o'n deud bod nhw'n gywir.

"Ag odd on jyst person ffyni, caring, focused, a positif. Byth yn rili sulkio na ddim byd felna, cario 'mlaen, cario 'mlaen, cario 'mlaen, roedd o jyst mor annwyl a caredig."

Ychwanegodd fod y gefnogaeth y mae hi a'i theulu wedi ei dderbyn wedi bod o gymorth mawr iddi.

Mae tudalen gasglu arian gafodd ei sefydlu gafodd ei sefydlu'n lleol eisoes wedi casglu dros £20,000 ar gyfer y teulu.