Mae angladd Brianna Ghey yn cael ei gynnal yn Warrington ddydd Mercher. 

Bu farw Brianna, oedd yn 16 oed, ar ôl cael ei thrywanu yn farw mewn parc yn y dref yn Sir Gaer ym mis Chwefror. 

Fe wnaeth marwolaeth Brianna, oedd yn ferch drawsryweddol, sbarduno ymateb cryf ymysg y gymuned LHDTC+. 

Cafodd gwylnosau eu cynnal mewn dinasoedd ar draws y DU, gan gynnwys Caerdydd, Llundain a Glasgow. 

Mewn datganiad cyn yr angladd, gofynnodd teulu Brianna i unrhyw un oedd am fynychu'r angladd i wisgo dillad pinc. 

Mewn teyrnged iddi, dywedodd teulu Brianna yn dilyn ei marwolaeth bod ei cholled wedi gadael "twll enfawr'. 

"Roedd hi'n gymeriad mawr a oedd yn gwneud argraff ar bawb oedd yn ei chwrdd.

"Roedd Brianna yn hardd, ffraeth a doniol. Roedd Brianna yn gryf, di-ofn ac yn unigryw.

"Mae colled ei bywyd ifanc wedi gadael twll enfawr yn ein teulu ac rydym yn gwybod bod y ffrindiau ac athrawon oedd yn ei bywyd yn teimlo'r un fath."

Cafodd dau unigolyn yn eu harddegau eu harestio a'u cyhuddo o lofruddio Brianna yn dilyn ei marwolaeth. 

Mae'r ddau ohonynt - bachgen 15 oed o Leigh a merch 15 oed o Warrington - yn y ddalfa tan eu hachos llys ym mis Gorffennaf. 

Hyd yma, nid yw'r heddlu wedi cadarnhau os oedd llofruddiaeth Brianna yn drosedd casineb.