Mae newyddiadurwyr sydd yn gweithio i sianel newyddion ‘Iran international’ yn gofyn i gefnogwyr Cymru ac Iran anfon cynnwys o Qatar i’r sianel yn ystod cystadleuaeth Cwpan y Byd.

Daw’r cais wedi i fisas y newyddiadurwyr gael eu diddymu wrth iddynt geisio cael mynediad i Qatar i ohebu o’r wlad yn ystod y gystadleuaeth.

Yn ôl y newyddiadurwr Iranaidd, Reza Mohaddes, sydd wedi ei leoli yn Llundain, Llywodraeth Iran sydd wedi annog Qatar i beidio awdurdodi fisas i newyddiadurwyr ‘Iran international’.

“’Da ni yn credu bod Llywodraeth Iran wedi gofyn i Qatar wrthod ni mewn i’r wlad oherwydd ein bod ni yn lais i bobl Iran,” meddai Mr Mohaddes.

Mae Qatar wedi gwadu yn y gorffennol unrhyw honiadau o gamweinyddu mewn cysylltiad â Chwpan y Byd. 

Image

Mae’r sianel newyddion wedi bod yn adrodd am y protestiadau sydd wedi eu cynnal ar draws Iran yn dilyn marwolaeth Mahsa Amini.

“Mae Llywodraeth Iran yn poeni y bydd gan newyddiadurwyr Iran newyddiaduriaeth rydd yno. Achos os byddwn ni yna, ni fydda llais Iran a byddwn yn adlewyrchu llais y cefnogwyr."

Mae tîm pêl-droed Iran yn wynebu Cymru ar 25 Tachwedd ac roedd Mr Mohaddes yn gobeithio gohebu yn ystod y gêm.

Ychwanegodd:“’Da ni wedi bod yn paratoi ers misoedd i fod yno yn ystod un o gystadlaethau chwaraeon mwyaf y byd. Roedd 10 o honnom ni wedi bwriadu mynd.

“Mae rhai o fy nghydweithwyr wedi bod yng Nghaerdydd yn cyfweld rheolwr tîm Cymru ac roedden ni wedi bwriadu bod yn Doha yn adrodd am daith y timau gan gynnwys Cymru.”

Qatar has rescinded the visas of a team of @IranIntl journalists intending to travel to Qatar to cover FIFA World Cup. The move comes as Iran's gov't has worked with Doha to "avoid possible problems" during the tournament and threatened journalists with "returning them to Iran". pic.twitter.com/WRXaepbv8N

— Iran International English (@IranIntl_En) November 16, 2022

Er siom y newyddiadurwyr maen nhw’n benderfynol o rannu taith Cwpan y Byd Iran gyda’u cenedl.

“Byddwn ni yn Llundain yn gohebu a bydd rhai newyddiadurwyr yng Nghaerdydd yn ystod gêm Iran a Chymru er mwyn adrodd y cyffro.

“Dan ni isio cefnogwyr Iran a Chymru sydd yn Qatar ar gyfer y gêm i ddanfon fideos i ni.”

“Eu camerâu nhw yw ein camerâu ni nawr. Bydd y fideos yn cael eu defnyddio i adlewyrchu llais yn Iran drwy ryddid barn a rhyddid y wasg."