Nam trydanol oedd yn gyfrifol am achosi tân mewn adeilad yng Nghaernarfon nos Wener meddai'r Gwasanaeth Tân.

Cafodd y gwasanaethau brys eu galw i ymateb i dân mewn adeilad yng nghanol y dref toc wedi 20.00.

Roedd sawl fideo ar y cyfryngau cymdeithasol yn dangos tân yn llosgi mewn adeilad dros ffordd i Dafarn y Porth ar Stryd y Porth Mawr.

Dywedodd Gwasanaeth Tân ac Achub Gogledd Cymru ddydd Llun bod y tân wedi'i ddiffodd y noson honno.

"Cawsom alwad am 20.08 nos Wener i adroddiad am dân mewn adeilad adfeiliedig yng Nghaernarfon," meddai llefarydd.

"Mynychodd dau griw o Gaernarfon ac un o Fangor y digwyddiad a derbyniwyd y neges fod y digwyddiad o dan reolaeth am 22.27 yr un noson.

"Y gred yw bod y tân wedi'i achosi gan nam trydanol."