"Roeddwn i wedi penderfynu mynd i bob gêm gyda fy nghamera, a nawr mae gen i gannoedd o atgofion."

Yn 1989, fe benderfynodd Andrew Shanahan o Gaerdydd gymryd camera i wylio Cymru yn chwarae pêl-droed yn erbyn Gorllewin yr Almaen.

Roedd wedi bod yn tynnu cannoedd o luniau yn ystod gemau Caerdydd am flynyddoedd cyn hynny, ond fe benderfynodd gadw cofnod o gemau oddi cartref Cymru drwy lens camera hefyd.

Dywedodd wrth Newyddion S4C fod ganddo filoedd o luniau i gyd, a'i fod wedi mynd i dros 100 o gemau Cymru oddi cartref.

Dyma rai o'i luniau gorau o’r 1990au.

Image

Image

Image

Yn ddiweddar fe benderfynodd Andrew rannu rhai o'r lluniau mewn grwpiau Facebook i gefnogwyr Cymru.

"Yn amlwg mae'r lluniau yma wedi bod gyda fi am ddegawdau, ond dim ond ers mis Tachwedd rydw i wedi bod ar Facebook," meddai.

"Felly roeddwn i wedi penderfynu eu rhannu nhw; mae gen i lawer mwy i ddod hefyd.

"Gorllewin yr Almaen oedd y trip cyntaf i mi, rwy’n siŵr o fod wedi gwneud dros 100 ond dwi erioed wedi cyfrif."

Image

Image

Image

Dywedodd Andrew Shanahan ei fod heb swydd ar un adeg, ond fe benderfynodd deithio i wylio Cymru yn Nuremberg yn 1991.

Fe deithiodd heb unrhyw ddillad ychwanegol, gyda brwsh dannedd a'i gamera yn unig.

"Doedd dim swydd gen i ar y pryd, felly yr unig bethau roeddwn i wedi teithio gyda nhw oedd brwsh dannedd a chamera.

"Doedd dim dillad ychwanegol na dim gyda ni, ac fe gysgodd ein criw ni yn yr orsaf drenau yno."

Image

Image

Image

Image